Бізнес-навіны

"АМКАДОР" прэзентаваў свае навінкі для Іркуцкай вобласці

Фота з архiва

27 жніўня, Мінск /Кар. БЕЛТА/. "АМКАДОР" прэзентаваў свае навінкі для Іркуцкай вобласці, паведамілі БЕЛТА ў прэс-службе прадпрыемства.

У прыватнасці, былі прадстаўлены навінкі лесапрамысловых машын холдынга цяжкага класа, якія паспяхова прайшлі выпрабаванні і будуць пастаўлены ў серыйную вытворчасць у ТАА "АМКАДОР-Анега" ў Петразаводску (Рэспубліка Карэлія) - форвардар "АМКАДОР FF1681" і харвестар "АМКАДОР FH3081".

"АМКАДОР FF1681" - пагрузачна-транспартная машына, прызначаная для збору, пагрузкі і тралёўкі круглых лесаматэрыялаў па тэрыторыі лесасек, лесавозных дарогах, а таксама для выканання пагрузачна-разгрузачных работ і аперацый па сартаванні і складзіраванні лесаматэрыялаў. Поўнапрывадная васьміколавая тэхніка цяжкага класа з шарнірна-сучлененай рамай і гідрастатычнай трансмісіяй з электронным кіраваннем аснашчана рухавіком "ЯМЗ-536 stage 3A" магутнасцю 300 к.с., што забяспечвае ёй грузападымальнасць не меншую за 16 т.

"АМКАДОР FH3081" - самаходная машына, прызначаная для валкі дрэў, абрэзкі сукоў, распілоўкі дубцоў на сартыменты пры правядзенні высечак галоўнага карыстання. Васьміколавы харвестар з колавай формулай 8х8, шарнірна-сучлененай рамай і гідрастатычнай трансмісіяй у базавай версіі аснашчаны рухавіком "ЯМЗ 536 stage 3A". Максімальны памер пілавання ствала 780 мм, што цалкам адпавядае запатрабаванням лесанарыхтоўшчыкаў Сібіры.

"Абедзве машыны вызначае высокі камфорт рабочага месца аператара. Кабіны забяспечаны сістэмай клімат-кантролю, аўтаномным абагравальнікам. Шкло полікарбанатнае таўшчынёй 10 мм або 12 мм, з ультрафіялетавай абаронай. Магчыма ўстаноўка камеры задняга віду, а таксама сістэм навігацыі, пазіцыяніравання, аддаленага доступу і бесправадной перадачы даных аб параметрах работы машыны. Таксама магчыма ўстаноўка дадатковых опцый: сістэмы падагрэву сядзення, дапаўненне панарамных люстэркаў камерай задняга віду, устаноўка сістэмы ГЛОНАС і GPS, ланцугоў і гусеніц проціслізгацення і іншых карысных сістэм", - адзначылі ў прэс-службе.

Дарожнікам і камунальнікам Іркуцкай вобласці таксама была прапанавана яшчэ адна навінка, якая серыйна вырабляецца ў Беларусі і ўжо атрымала добрыя водгукі спажыўцоў, - гэта аўтагрэйдар "Амкадор G160".

"Машына прызначана для землярыйна-прафіліровачных работ пры будаўніцтве і ўтрыманні дарог. Яна можа выкарыстоўвацца на работах па перамяшчэнні, размеркаванні грунту і дарожна-будаўнічых матэрыялаў, планіроўцы адкосаў, выемак, насыпаў, уладкаванні карыта і бакавых канаў, ачыстцы дарог ад снегу, змешванні грунту з дабаўкамі і вяжучымі матэрыяламі на палатне дарогі, а таксама для рыхлення асфальтавых пакрыццяў, бруку і цяжкіх грунтоў з дапамогай дадатковага рабочага органа - рыхліцеля, размешчанага ззаду аўтагрэйдара", - расказалі на прадпрыемстве.

У базавай камплектацыі аснашчаецца адвалам грэйдарным, адвалам і рыхліцелем, а па дадатковым заказе можа быць устаноўлена спадарожнікавая сістэма нівеліравання, якая забяспечвае высокую дакладнасць правядзення прафіліровачных работ і значна павышае прадукцыйнасць машыны.

"Тэхніку "АМКАДОР" добра ведаюць спажыўцы Іркуцкай вобласці дзякуючы рабоце дыстрыб'ютара холдынга ТАА "АМКАДОР-Росмаш" і дылера ТАА "Кар'ерныя машыны". Толькі за першыя чатыры месяцы 2021 года ў рэгіёне была рэалізавана прадукцыя прадпрыемства на суму большую за Br6,5 млн", - падкрэслілі ў прэс-службе.

Холдынг "АМКАДОР" кампанія з 94-гадовай гісторыяй, якая аб'ядноўвае 30 юрыдычных асоб, у тым ліку 21 завод у Беларусі, Расіі, Узбекістане і Літве. Прадпрыемствы інтэграваны ў адзіны тэхналагічны ланцуг, дзе кожны ўдзельнік спецыялізуецца на выпуску пэўных дэталей, вузлоў і агрэгатаў для ўнутранага спажывання. Узровень камплектацыі гатовых машын элементамі ўласнай вытворчасці дасягае 85 працэнтаў. У лінейцы прадукцыі - машыны для сельскай і лясной гаспадарак, камунальнай і дарожна-будаўнічай галін, лагістычнага і паліўна-энергетычнага комплексаў і іншых сфер эканамічнай дзейнасці. Усяго ў вытворчай лінейцы налічваецца больш за 125 мадэлей і мадыфікацый машын. Беларуская тэхніка гэтага брэнда працуе ў 40 краінах.

версія для друку

зрабіць стартавай

дабавіць у выбранае