Бізнес-навіны

Аб'яднаныя рынкі і эксплуатацыя БелАЭС. Як Беларусь і РФ будуць у далейшым супрацоўнічаць у энергетыцы

Фота з архiва

1 лістапада, Мінск /Кар. БЕЛТА/. Міністр энергетыкі Беларусі Віктар Каранкевіч расказаў аб планах па супрацоўніцтве з РФ у інтэрв'ю праграме "Размова ў Прэзідэнта" на тэлеканале "Беларусь 1", паведамляе БЕЛТА.

"З нашымі расійскімі калегамі мы прадаўжаем работу па фарміраванні аб'яднаных рынкаў газу і электрычнай энергіі. Па электраэнергіі падрыхтаваны праект міждзяржаўнага дагавора. Ён узгоднены з нашымі расійскімі калегамі і прайшоў узгадненне з органамі дзяржаўнага кіравання, ва ўстаноўленым парадку ўнесены ў Савет Міністраў. Таксама актыўна цяпер вядзецца работа па ўзгадненні правіл функцыянавання аб'яднанага рынку электраэнергіі. Да канца года мы павінны завяршыць работу па падрыхтоўцы ўзгодненага праекта гэтага дакумента", - сказаў Віктар Каранкевіч.

Паводле яго слоў, цэнавыя ўмовы па газе на 2023-2025 гады вызначаны. "У далейшым неабходна ўзгадніць прынцыпы работы аб'яднанага рынку газу, а таксама ўмовы работы суб'ектаў гаспадарання пасля 2025 года. Самая галоўная задача - далейшае збліжэнне і выхад на роўныя ўмовы для суб'ектаў дзвюх краін. І, адпаведна, павышэнне канкурэнтаздольнасці не толькі Беларусі, але і ў цэлым Саюзнай дзяржавы, магчымасць сумеснага выхаду на рынкі трэціх краін", - дадаў міністр.

Пасля завяршэння будаўніцтва БелАЭС супрацоўніцтва з "Расатамам" не спыніцца. "Нашы ўзаемаадносіны будуць толькі пашырацца. Калі браць саму атамную станцыю, то гэта пытанні тэхнічнай падтрымкі, навуковага суправаджэння, эксплуатацыі БелАЭС. Мы разам выпрацоўваем узгодненыя падыходы, накіраваныя на далейшае ўзаемавыгаднае супрацоўніцтва. У прыватнасці, было падпісана пагадненне аб магчымасці сумеснага фарміравання і выкарыстання страхавога запасу, рамонтнага абменнага фонду паміж канцэрнам "Расэнергаатам" і БелАЭС. Гэта будзе садзейнічаць аператыўнаму вырашэнню пытанняў, звязаных з эксплуатацыяй аб'екта. Таксама разглядаецца прадаўжэнне гарантыйнага тэрміну на абсталяванне", - адзначыў кіраўнік Мінэнерга.

Усе гэтыя пытанні супрацоўніцтва з "Расатамам" будуць замацоўвацца ў асобным пратаколе. "Падрыхтаваны ўжо адпаведны праект пратакола аб унясенні змяненняў у міжурадавае пагадненне аб будаўніцтве Беларускай АЭС", - звярнуў увагу Віктар Каранкевіч.

Актуальна супрацоўніцтва і па пытаннях абыходжання з радыеактыўнымі адходамі. "Нам важна вывучыць расійскі вопыт, тэхналогіі і разгледзець магчымасць прымянення ў Беларусі", - дадаў міністр.

версія для друку

зрабіць стартавай

дабавіць у выбранае