Бізнес-навіны

За апошнія чатыры гады экспарт "Белдзяржхарчпрама" прырос на 35 працэнтаў

Фота з архiва

20 лютага, Мінск /Кар. БЕЛТА/. За апошнія чатыры гады экспарт "Белдзяржхарчпрама" прырос на 35 працэнтаў, паведамілі БЕЛТА ў канцэрне.

Адбылося пасяджэнне савета канцэрна "Белдзяржхарчпрам", у рабоце якога прынялі ўдзел намеснік прэм'ер-міністра Леанід Заяц і старшыня Беларускага прафесійнага саюза работнікаў аграпрамысловага комплексу Васіль Хвацік.

З дакладам аб выніках работы за 2023 год, пастаўленых задачах на першы квартал бягучага года і планах на 2024 год выступіў намеснік старшыні канцэрна "Белдзяржхарчпрам" Аляксандр Кіжук.

Ён адзначыў, што 2023 год склаўся для канцэрна даволі паспяхова ў плане выканання асноўных мэтавых паказчыкаў работы. Драйверамі росту прамысловай вытворчасці ў 2023 годзе выступілі цукровая (тэмп 115,1 працэнта), тытунёвая (109,3 працэнта), кандытарская (тэмп 105,9 працэнта) і алкагольная галіны (104,6 працэнта).

Па выніках мінулага года экспарт па ўсёй наменклатуры канцэрна склаў 103,1 працэнта. Перш за ўсё гэта забяспечана за кошт наяўнасці значна большага экспартнага рэсурсу цукру: экспартавана практычна на 105 тыс. т цукру больш.

За апошнія чатыры гады экспарт канцэрна прырос на 35 працэнтаў. У 2 разы павялічаны экспарт алейна-тлушчавай галіны, у 3,5 раза павялічыўся экспарт дрожджаў. Прыраслі кандытарская галіна - на 60 працэнтаў, цукровая - на 33 працэнты, алкагольная - на 20,4 працэнта, піваварная - на 11 працэнтаў, солевая - на 15,5 працэнта.

ТОП-5 асноўных экспарцёраў па-ранейшаму складаюць ААТ "Мазырсоль", прадпрыемствы цукровай галіны і СААТ "Камунарка".

Краінавы партфель экспарту ў 2023 годзе зведаў некаторыя змяненні. Павялічана доля Расіі, утрыманы пастаўкі ў краіны ЕС, нягледзячы на санкцыі. Істотны прырост па Кітаі і Афрыцы.

Ажыццёўлены пастаўкі на новыя рынкі: Мексіка (алкагольная прадукцыя), Самалі (цукар), Экватарыяльная Гвінея (солад піваварны), Буркіна-Фасо (цукар), Ліван (цукар), Індыя (рапсавы алей), Саудаўская Аравія (рапсавы алей). Таксама адноўлены пастаўкі ў Бельгію (жамерыны), Ірак (алкагольная прадукцыя), Гану (цукар), Чарнагорыю (цукар).

Акрамя таго, павялічаны пастаўкі не толькі ў краіны СНД, але і на рынкі "далёкай дугі" ў ААЭ (у 2,4 раза), В'етнам (у 2,2 раза), Рэспубліку Карэю (у 2,2 раза) і іншыя краіны.

версія для друку

зрабіць стартавай

дабавіць у выбранае