Бізнес-навіны

Харытончык: рэалізацыя падпісаных на ІНАПРАМе дакументаў узмоцніць прамысловы дыялог Беларусі і Расіі

Фота з архiва

Ужо хутка пачнецца адна з самых значных і маштабных прамысловых падзей - міжнародная выстаўка ІНАПРАМ. Гэта ключавое галіновае спецыялізаванае мерапрыемства разгорнецца з 10 па 13 ліпеня на пляцоўцы выставачнага цэнтра "Екацярынбург-Экспа" ў Екацярынбургу (Расійская Федэрацыя). Беларусь упершыню выступіць у якасці краіны-партнёра. Колькі кантрактаў плануецца падпісаць і якія прадпрыемствы будуць прадстаўлены на выстаўцы ад Міністэрства прамысловасці Беларусі, расказаў намеснік міністра прамысловасці Дзмітрый Харытончык.

Што прадставяць прадпрыемствы Міністэрства прамысловасці

Агульная плошча беларускай экспазіцыі перасягне 3 тыс. кв.м, на якіх размесцяцца каля 50 прадпрыемстваў сістэмы Мінпрама.

Паводле слоў Дзмітрыя Харытончыка, на нацыянальнай экспазіцыі будзе прэзентаваны стэнд "Прамысловая вытворчасць і прамысловая кааперацыя". Шэсць прадпрыемстваў Мінпрама прадэманструюць тэхніку на плошчы больш як 1,5 тыс. кв.м унутры выставачнага цэнтра "Екацярынбург-Экспа" і на 21 кв.м на вулічнай плошчы. У цэлым будзе прэзентаваны 21 натурны ўзор тэхнікі ААТ "МАЗ", ААТ "АМКАДОР", ААТ "Гомсельмаш", ВКМ Holding ("Белкамунмаш"), ААТ "МТЗ".

Акрамя гэтага, упершыню прадугледжана работа аб'яднанага стэнда станкабудаўнічых прадпрыемстваў: 17 арганізацый размесцяцца на 315 кв.м унутры выставачнага цэнтра і пакажуць 13 натуральных узораў станкоў.

Аб'яднаны стэнд прамысловых прадпрыемстваў будзе прадстаўлены на 290 кв.м. Больш за 20 прадпрыемстваў Мінпрама прэзентуюць узоры прадукцыі, у тым ліку ААТ "Магілёўліфтмаш", ААТ "Мінскі электратэхнічны завод імя В.І.Казлова, ААТ "ММЗ", ААТ "БМЗ", ААТ "Інтэграл", ААТ "ММЗ імя С.І.Вавілава", ААТ "БАТЭ" і іншыя.

Таксама на ІНАПРАМе будзе размешчаны індывідуальны стэнд ААТ "БЕЛАЗ" на плошчы 190 кв.м з прэзентацыяй макетаў самазвалаў з высокім расійска-беларускім інтэграцыйным складнікам.

"Мінпрам сумесна з БелГПП прапрацаваў варыянт найбольш аптымальнага размяшчэння стэндаў беларускіх удзельнікаў. Прадугледжана наяўнасць інфармацыі аб інтэграцыйным складніку", - адзначыў Дзмітрый Харытончык.

Інавацыйныя распрацоўкі

З усяго пераліку прадукцыі прадпрыемстваў Мінпрама як мінімум 5 экспанатаў - інавацыйныя распрацоўкі. Гэта новы магістральны цягач МАЗ, аснашчаны больш магутным рухавіком класа Еўра-6 і рабатызаванай каробкай перадач, трактары МТЗ (беспілотныя мадэлі, эксклюзіўны гусенічны трактар для работы на пераўвільготненых глебах), ліфт ААТ "Магілёўліфтмаш" з вялікай скорасцю пад'ёму, кар'ерны самазвал БЕЛАЗ-7558Н (макет, новы 90-тоннік з газапоршневым рухавіком, які працуе на звадкаваным прыродным газе).

Таксама з інавацыйных распрацовак Дзмітрый Харытончык адзначыў такарны станок з ЛПК мадэлі 16ГС25СУ1А ОАО "ГЗСВ". "Навінкай з'яўляецца ўстаноўленае праграмнае забеспячэнне кампаніі ААТ "Тэхнікам" (Беларусь), што дазваляе знізіць патрабаванні да кваліфікацыі абслуговага персаналу", - растлумачыў намеснік міністра.

Кантракты і пагадненні

Намеснік міністра прамысловасці падкрэсліў, што ў час ІНАПРАМа плануецца падпісанне значнага пакета дакументаў. Усяго рыхтуюцца да падпісання амаль 60 дакументаў на агульную суму каля $180 млн. Найбольшы фінансавы складнік у гэтым аб'ёме належыць прадпрыемствам сістэмы Мінпрама, якія маюць намер заключыць не менш як 11 экспартных камерцыйных кантрактаў (пагадненняў) на суму ад $157,4 млн.

Акрамя таго, форум стане пляцоўкай для падпісання не менш як 14 стратэгічных пагадненняў (мемарандумаў, дагавораў).

Сустрэчы і перагаворы

Дэлегацыю Міністэрства прамысловасці Беларусі на форуме ўзначаліць міністр Аляксандр Рагожнік. Запланаваны яго ўдзел у перагаворах на ўзроўні ўрадаў дзвюх краін, а таксама серыя двухбаковых сустрэч з кіраўнікамі рэгіёнаў Расіі і кіраўніцтвам шэрага буйнейшых прамысловых прадпрыемстваў Расіі.

Таксама Аляксандр Рагожнік прыме ўдзел у пасяджэнні Савета па прамысловай палітыцы краін ЕАЭС, у галоўнай стратэгічнай сесіі, дзелавым форуме "Прамысловы дыялог: Расія - Рэспубліка Беларусь" і секцыі "Станкабудаванне як прыярытэт адзінай прамысловай палітыкі Беларусі і Расіі".

Работа па падрыхтоўцы двухбаковых дакументаў для падпісання ў рамках ІНАПРАМа прадаўжаецца, дапрацоўваецца праграма афіцыйных сустрэч кіраўніцтва Мінпрама, каб вынікі гэтай значнай і маштабнай прамысловай падзеі былі максімальна эфектыўнымі для дзвюх краін.

"Мінпрам у поўнай меры выкарыстоўвае ІНАПРАМ для раскрыцця патэнцыялу прамысловых прадпрыемстваў, умацавання міжрэгіянальных эканамічных сувязей. Упэўнены, што форум прынясе беларускім і расійскім прамыслоўцам новыя прамыя бізнес-кантакты. У цэлым рэалізацыя падпісаных на форуме дакументаў будзе садзейнічаць паглыбленню практычнага супрацоўніцтва, дынаміцы гандлёвых адносін і падтрымцы праектаў кааперацыі вядучых прадпрыемстваў дзвюх краін, а значыць, далейшаму будаўніцтву тэхналагічнага суверэнітэту Беларусі і Расіі", - падагульніў Дзмітрый Харытончык.

Міжнародная прамысловая выстаўка ІНАПРАМ праводзіцца ў Екацярынбургу штогод з 2010 года і выступае галоўнай індустрыяльнай, гандлёвай і экспартнай пляцоўкай у Расіі. У гэтым годзе галоўная тэма - "Устойлівая вытворчасць: стратэгіі абнаўлення". На інтэлектуальнай пляцоўцы кіраўнікі бізнесу і ўлады прапануюць свае рашэнні па пераадоленні рызык і пагроз.

БЕЛТА

версія для друку

зрабіць стартавай

дабавіць у выбранае