Бізнес-навіны

16 сакавіка, Набярэжныя Чаўны /Юлія Огнева - БЕЛТА/. Вытворчасць ліфтаў ААТ "Магілёўліфтмаш" можа быць арганізавана ў Татарстане. Прапрацоўка адпаведнай магчымасці прадугледжваецца падпісаным сёння пратаколам дамоўленасцей, дасягнутых па выніках сустрэч прэм'ер-міністра Беларусі Андрэя Кабякова і прэзідэнта Татарстана Рустама Мініханава, перадае карэспандэнт БЕЛТА.

Прадугледжваецца, што вытворчыя магутнасці могуць размясціцца на пляцоўцы ААТ "ВА "Завод імя Серго".

Таксама ў дакуменце дадзена даручэнне вывучыць магчымасць павелічэння паставак у Татарстан беларускай пасажырскай тэхнікі (трамваяў, тралейбусаў і аўтобусаў), арганізацыі скораснага трамвайнага маршруту, аднаўлення і рамонту трамвайнай тэхнікі, а таксама дыспетчарызацыі пасажырскіх перавозак.

Акрамя таго, плануецца павялічыць пастаўкі беларускай сельскагаспадарчай тэхнікі ААТ "Гомсельмаш" у Татарстан, у тым ліку па рэспубліканскіх праграмах субсідзіравання. Даручана прадоўжыць супрацоўніцтва ў сферы паставак лесанарыхтоўчай, дарожна-будаўнічай тэхнікі, зернесушыльных комплексаў вытворчасці ААТ "Амкадор" - кіруючая кампанія холдынга".

Пратаколам прадугледжана прапрацаваць і ўнесці прапановы аб магчымасці паставак рапсу ў Татарстан і шроту ў Беларусь.

Прадугледжваецца арганізаваць узаемныя Дні культуры ў Беларусі і Татарстане, актывізаваць супрацоўніцтва ў галіне турызму.