Бізнес-навіны

Выстаўка Made in Belarus адкрылася ў "Вялікім камені"

30 чэрвеня, Мінск /Кар. БЕЛТА/. Выстаўка беларускіх вытворцаў Made in Belarus адкрылася сёння на пляцоўцы гандлёва-выставачнага цэнтра ў Кітайска-беларускім індустрыяльным парку "Вялікі камень", паведамілі БЕЛТА ў Беларускай гандлёва-прамысловай палаце, якая з'яўляецца арганізатарам выстаўкі.

У Беларусі выстаўка праходзіць упершыню. У ёй прымаюць удзел больш за 90 айчынных арганізацый і прадпрыемстваў, якія прадстаўляюць шырокі спектр экспартна арыентаванай прадукцыі і паслуг такіх галін, як машынабудаванне, транспарт, лагістыка, энергетыка, будаўніцтва, дрэваапрацоўка, навука і тэхналогіі, тэлекамунікацыі, фармацэўтыка, вытворчасць прадуктаў харчавання і паслугі. У цэлым жа Мade in Belarus стала ўжо візітнай карткай беларускага экспарту.  Толькі за апошнія два гады маштабныя выстаўкі пад гэтым брэндам з удзелам вядучых экспарцёраў, арганізаваныя БелГПП, пабывалі ў Нур-Султане, Алматы, Кіеве, Тбілісі, Ташкенце.

Як адзначаюць арганізатары, месца правядзення выстаўкі выбрана не выпадкова. Made in Belarus стане адным з ключавых элементаў праграмы знакавага мерапрыемства - Форуму па рэгіянальным супрацоўніцтве і развіцці ў рамках ініцыятывы "Пояс і Шлях" "Адкрыты парк "Вялікі камень" - прыклад глабальных магчымасцей". Форум, які пройдзе 2 ліпеня, збярэ каля 500 удзельнікаў з 20 краін. Сярод іх Аўстрыя, Балгарыя, Вялікабрытанія, Германія, Ізраіль, Кітай, Нідэрланды, Славакія, Турцыя, Чэхія, Эстонія. Беларуская экспазіцыя дасць магчымасць наглядна прадэманстраваць экспартны патэнцыял краіны гасцям форуму.

Вядучыя машынабудаўнічыя прадпрыемствы Беларусі прадстаўляюць на выстаўцы свае распрацоўкі, арыентаваныя на экспарт у Кітай і далёкае замежжа. Сярод экспанентаў - БелАЗ, "БАТЭ" - кіруючая кампанія холдынга "Аўтакампаненты", "Экран", "Белкард", Барысаўскі завод аўтаагрэгатаў, Баранавіцкі аўтаагрэгатны завод, "Бабруйскаграмаш", "Чырвоны барацьбіт". Азнаёміцца з узорамі тэхнікі, вырабленай у Беларусі, можна на адкрытай пляцоўцы.
 
Шырокі спектр паслуг прадставілі беларускія будаўнічыя арганізацыі. У прыватнасці, "Белкамунпраект" прадстаўляе паслугі па праектаванні і будаўніцтве жылых і адміністрацыйных будынкаў, МАПІД - будаўнічыя тэхналогіі і матэрыялы для будаўніцтва і аддзелкі катэджных будынкаў, "Гомельбудматэрыялы" - матэрыялы для будаўніцтва і ўцяплення жылых і адміністрацыйных будынкаў, "Мінскпрамбуд" - поўны комплекс будаўнічых паслуг ад праектавання будынка да яго здачы заказчыку.

"Белтэлекам" прадставіў на выстаўцы сучасныя паслугі, рэалізаваныя на аснове тэхналогіі GPON, а таксама лічбавыя рашэнні і прадукты, якія могуць прымяняцца для павышэння эфектыўнасці і развіцця бізнесу. Аснову экспазіцыі складаюць паслугі прадастаўлення ў карыстанне міжнародных каналаў сувязі, высакаскораснага доступу ў інтэрнэт, арганізацыі сеткі Wi-Fi, відэакантроль і іншыя пакеты паслуг. Магчымасці ў сферы вытворчасці абсталявання лічбавых сістэм перадачы даных, тэлекамунікацыйнага і аптычнага абсталявання, банкаўскага і ахоўнага абсталявання прадставіла "Прамсувязь".

Вялікая экспазіцыя беларускіх навукова-тэхнічных распрацовак, арганізаваная Дзяржаўным камітэтам па навуцы і тэхналогіях сумесна з Міністэрствам адукацыі і Нацыянальнай акадэміяй навук Беларусі, прадставіла як падведамныя арганізацыі НАН і Мінадукацыі, так і шэраг прыватных арганізацый. Можна азнаёміцца з некалькімі дзясяткамі інавацыйных і перспектыўных праектаў і распрацовак у самых розных сферах - ад новых матэрыялаў і біятэхналогій да сацыяльных праектаў у галіне медыцыны.

Шырока прадстаўлены на выстаўцы таксама медыцынская і фармацэўтычная прадукцыя, прадукты харчавання, прадукцыя дрэваапрацоўкі.

Выставачным аператарам Made in Belarus выступае выставачнае прадпрыемства "Белінтэрэкспа" БелГПП.

Адначасова з выстаўкай Made in Belarus на пляцоўцы гандлёва-выставачнага цэнтра адкрылася выстаўка кітайскіх тавараў і паслуг з удзелам больш як 100 кітайскіх кампаній, арганізаваная China Machinery Engineering Corporation, а таксама пастаянна дзеючая выстаўка з удзелам беларускіх і кітайскіх кампаній, арганізаваная China Merchants Group. Усяго ў трох выстаўках прымаюць удзел каля 250 кампаній з Беларусі, Кітая і іншых краін.

версія для друку

зрабіць стартавай

дабавіць у выбранае