Бізнес-навіны

"Вялікі камень" і Нацыянальны аэрапорт Мінск падпісалі мемарандум аб супрацоўніцтве

Фота з архiва

22 студзеня, Мінск /Кар. БЕЛТА/. Кітайска-беларускі індустрыяльны парк "Вялікі камень" і Нацыянальны аэрапорт Мінск падпісалі мемарандум аб супрацоўніцтве, перадае карэспандэнт БЕЛТА.

Бакі будуць разам прапрацоўваць ініцыятывы па спалучэнні ў межах лагістычнай зоны парку паветранага транспарту з чыгуначным і аўтамабільным.

Прадугледжана таксама ўзаемадзеянне па пытаннях будаўніцтва транспартна-лагістычнай інфраструктуры ў гэтай зоне з прыцягненнем інвестыцый.

Сярод напрамкаў супрацоўніцтва - арганізацыя транспартных зносін, стварэнне інфраструктуры на прылеглых тэрыторыях.

Як растлумачыў першы намеснік генеральнага дырэктара СЗАТ "Кампанія па развіцці індустрыяльнага парка" Кірыл Карацееў, цяпер пачынаецца другі этап асваення тэрыторыі "Вялікага каменя", дзе ў гэтым годзе пачнуць разгортванне мультымадальнага чыгуначнага грузавога тэрмінала. З падпісаннем мемарандума бакі пры рэалізацыі праектаў будуць улічваць партнёрскія інтарэсы. "Будзем глядзець з пункту гледжання партнёрства, каб кожны наш крок прыносіў карысць не толькі парку, але і аэрапорту. І наадварот. Будзем рабіць гэта сумесна і ўзаемавыгадна", - адзначыў Кірыл Карацееў.

"У "Вялікага каменя" і аэрапорта ўзаемаўвязаны сетка энергазабеспячэння, дарожная сетка. Адпаведна, гэты напрамак будзем развіваць далей. Магчыма, прыйдзем да нейкага сумеснага фінансавання, але гэта ўжо больш аддаленая перспектыва з улікам няпростай сённяшняй сітуацыі", - дадаў ён.

Плануецца, што праз "Вялікі камень" пройдзе чыгуначная ветка, якая звяжа Мінск і аэрапорт. Гэта будзе канкурэнтнай перавагай для паветранай гавані і індустрыяльнага парка, лічыць Кірыл Карацееў.

Кітайска-беларускі індустрыяльны парк "Вялікі камень" - асаблівая эканамічная зона са спецыяльным прававым рэжымам, размешчаная за 25 км ад Мінска. У "Вялікім камені" зарэгістраваны 68 ​​рэзідэнтаў з 14 краін. Прыярытэтныя для парка напрамкі - машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб'ёмаў даных.

версія для друку

зрабіць стартавай

дабавіць у выбранае