Бізнес-навіны

Удзел Беларусі ў транспартнай і камунальнай рэформах у Санкт-Пецярбургу. Аб чым Крутой гаварыў з губернатарам

Фота russia.mfa.gov.by

14 красавіка, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой 13 красавіка ў Санкт-Пецярбургу правёў сустрэчу з губернатарам паўночнай расійскай сталіцы Аляксандрам Бягловым, паведамілі БЕЛТА ў прэс-службе дыппрадстаўніцтва.

Дзмітрый Крутой падзякаваў Аляксандру Бяглову за яго асабісты ўклад у дасягненне прынцыпова новага ўзроўню супрацоўніцтва паміж Беларуссю і Санкт-Пецярбургам, што дало магчымасць у кароткія тэрміны дабіцца гістарычных вынікаў нарошчвання эканамічнага ўзаемадзеяння. "Па выніках 2022 года дасягнуты рэкордныя аб'ёмы ўзаемнага гандлю Рэспублікі Беларусь і Санкт-Пецярбурга, тавараабарот упершыню перасягнуў планку $2 млрд. Гэта красамоўнае пацвярджэнне таго, што нават беспрэцэдэнтна актыўны санкцыйны націск Захаду не можа перашкодзіць развіццю цеснага саюза паміж Беларуссю і Расіяй, а таксама адным з нашых ключавых партнёраў - Санкт-Пецярбургам", - заявіў пасол.

Паводле даных прэс-службы, адно з важнейшых пытанняў на перагаворах быў удзел беларускіх вытворцаў у маштабнай транспартнай рэформе Санкт-Пецярбурга. "Беларускія прадпрыемствы гатовы своечасова выконваць як дзеючыя кантракты, так і нацэлены на асваенне выпуску з улікам патрэбнасцей горада дапрацаваных або абсалютна новых узораў пасажырскай тэхнікі - аўтобусаў асабліва вялікай умяшчальнасці, узораў тэхнікі трэцяга пакалення, мадэрнізаваных электробусаў, а таксама перонных электробусаў", - сказаў Дзмітрый Крутой. Ён дадаў, што асабліва значны для беларускага боку ўдзел у праекце па закупцы буйной партыі электробусаў і ў запуску новага трамвайнага маршруту пад рабочай і сімвалічнай для нашай трывалай дружбы назвай "Славянка".

У Санкт-Пецярбургу ў 2022 годзе была праведзена рэформа сістэмы прыбірання ўнутрыдамавых тэрыторый. Асноўную стаўку горад зрабіў на тэхніку беларускіх вытворцаў. Аналагічная рэформа плануецца і па лініі Камітэта па добраўпарадкаванні Санкт-Пецярбурга. "У час перагавораў бакі пацвердзілі зацікаўленасць прадаўжэння супрацоўніцтва і на гэтым участку, а таксама ў пашырэнні лінейкі камунальнай тэхнікі, якая пастаўляецца беларускімі вытворцамі ў расійскую паўночную сталіцу. Як і па пасажырскім транспарце, беларускія прадпрыемствы гатовы да распрацоўкі ўзораў тэхнікі індывідуальна для горада на Няве. Такая работа вядзецца Мінскім трактарным заводам і "АМКАДОРам", - расказалі ў прэс-службе.

Ва ўзаемадзеянні з адпаведнымі службамі горада ААТ "МТЗ" і ААТ "АМКАДОР" выбудавана эфектыўная сістэма сэрвіснага абслугоўвання тэхнікі. На сустрэчы бакі запэўнілі, што гэты падыход застанецца нязменным. Дзмітрый Крутой пацвердзіў гатоўнасць беларускіх прадпрыемстваў выканаць заяўкі на пастаўку камунальных машын для патрэб Камітэта па добраўпарадкаванні Санкт-Пецярбурга для ўтрымання дарог, а таксама садова-паркавай і лесапаркавай гаспадаркі горада.

"Перспектыўны напрамак супрацоўніцтва - арганізацыя зборачнай вытворчасці тэхнікі МАЗ для выпуску ў Санкт-Пецярбургу камбінаваных дарожных машын. Паводле слоў пасла, беларускі бок зацікаўлены ў рэалізацыі гэтага праекта. Пытанне даволі глыбока вывучана Мінскім аўтамабільным заводам адносна камбінаваных дарожных машын", - канстатавалі ў прэс-службе.

Рэалістычным фарматам супрацоўніцтва таксама можа быць арганізацыя зборкі камунальнай тэхнікі на базе шасі МАЗ, якія закупляюцца непасрэдна на Мінскім аўтамабільным заводзе. "Гатовы разглядаць прапановы аб магчымых партнёрах, якіх рэкамендуе ўрад Санкт-Пецярбурга, для рэалізацыі праекта па адной з прапанаваных схем", - пацвердзіў Дзмітрый Крутой.

"Сустрэча ў Санкт-Пецярбургу адбылася напярэдадні візіту губернатара Аляксандра Бяглова ў Мінск", - дадалі ў прэс-службе.

версія для друку

зрабіць стартавай

дабавіць у выбранае