Бізнес-навіны

У студзені-ліпені праз БУТБ прадалі ў 4 разы больш сырога малака, чым за ўвесь 2019 год

Фота з архiва

20 жніўня, Мінск /Кар. БЕЛТА/. На Беларускай універсальнай таварнай біржы з пачатку года рэалізавана 64 тыс. т сырога каровінага малака - у 4 разы больш, чым за ўвесь 2019 год. У грашовым выражэнні продажы таксама выраслі амаль у 4 разы - да Br57 млн, паведаміў карэспандэнту БЕЛТА прэс-сакратар БУТБ Раман Яніў.

"Назіраецца штомесячны рост аб'ёмаў здзелак з гэтай прадукцыяй. Калі ў маі і чэрвені было рэалізавана 4,4 тыс. т і 9,2 тыс. т сырога каровінага малака адпаведна, то ў ліпені - ужо 14,1 тыс. т. Цэны на сырое малако на біржавых таргах за апошнія тры месяцы падняліся на 15-20 працэнтаў і сёння дасягаюць 87 капеек за кілаграм", - сказаў Раман Яніў.

У цэлым для біржавога рынку сырога малака характэрна перавышэнне попыту над прапанаваннем, што садзейнічае актыўнаму выкарыстанню біржавой пляцоўкі пастаўшчыкамі малакасыравіны. "За сем месяцаў бягучага года дзякуючы павышэнню цэн у ходзе таргоў малакавытворцы атрымалі дадатковую выручку ў памеры Br346 тыс. Што датычыцца малакаперапрацоўчых прадпрыемстваў, то для іх біржа - гэта перш за ўсё альтэрнатыўны канал паставак малочнай сыравіны", - адзначыў прэс-сакратар.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае