Бізнес-навіны

У НАН створана больш за 20 сумесных цэнтраў і лабараторый з партнёрамі з Кітая

Фота з архiва

7 красавіка, Мінск /Кар. БЕЛТА/. У Нацыянальнай акадэміі навук Беларусі створана ўжо больш за 20 сумесных з кітайскімі партнёрамі міжнародных даследчых цэнтраў і лабараторый. Аб гэтым заявіў сёння старшыня Прэзідыума НАН Уладзімір Гусакоў у час падпісання пагаднення аб навукова-тэхнічным супрацоўніцтве паміж Нацыянальнай акадэміяй навук Беларусі і кітайскай кампаніяй "САМСЕ. Экалагічныя тэхналогіі", паведамілі карэспандэнту БЕЛТА ў прэс-службе НАН.

Кіраўнік Акадэміі навук адзначыў, што вучоныя НАН Беларусі маюць шматгадовы вопыт эфектыўнай кааперацыі з вучонымі Кітайскай Народнай Рэспублікі ў розных сферах. Вучонымі дзвюх краін выконваюцца важныя сумесныя навукова-тэхнічныя праекты, у тым ліку ў рамках праграм навукова-тэхнічнага супрацоўніцтва паміж Беларуссю і КНР, уключаючы экспартныя кантракты па заказе кітайскіх партнёраў. "У Нацыянальнай акадэміі навук Беларусі створана ўжо больш за 20 сумесных з кітайскімі партнёрамі міжнародных даследчых цэнтраў і лабараторый. Яны заняты распрацоўкай і адаптацыяй перадавых тэхналогій, а таксама іх пашырэннем на рынках Беларусі, Кітая і трэціх краін", - адзначыў Уладзімір Гусакоў.

Падпісаны ўжо дагаворныя дакументы НАН Беларусі з вядучымі навуковымі арганізацыямі Кітая - Кітайскай акадэміяй навук, акадэміямі навук шэрага правінцый КНР, буйнымі вытворчымі карпарацыямі Кітая - Huawei, AVIC і інш. "Нацыянальная акадэмія навук Беларусі надае асаблівае значэнне супрацоўніцтву з Кітайскай Народнай Рэспублікай - краінай, якая становіцца вядучай эканомікай і цэнтрам геапалітычнага прыцяжэння", - падкрэсліў Уладзімір Гусакоў.

Мэтамі падпісанага сёння пагаднення з'яўляюцца ўзмацненне навукова-тэхнічных патэнцыялаў бакоў, развіццё і пашырэнне адносін паміж навуковымі арганізацыямі, садзейнічанне навукова-тэхнічнаму супрацоўніцтву і практычнай рэалізацыі сумесных навукова-тэхнічных распрацовак у галіне аховы навакольнага асяроддзя. У першую чаргу, гэта датычыцца тэхналогій аднаўлення глебы, якія ўяўляюць асаблівы інтарэс з боку кітайскіх партнёраў. Супрацоўніцтва вучоных і спецыялістаў Беларусі і Кітая будзе ажыццяўляцца шляхам распрацоўкі і рэалізацыі сумесных навукова-тэхнічных праектаў, стварэння сумесных навукова-вытворчых цэнтраў, сумесных прадпрыемстваў, у тым ліку на базе бакоў і індустрыяльнага парка "Вялікі камень", сумеснай арганізацыі або ўзаемнага ўдзелу ў навукова-тэхнічных мерапрыемствах па шырокім спектры напрамкаў, а таксама абмену навукова-тэхнічнай і іншай інфармацыяй.

Удзельнікі сустрэчы адзначылі, што падпісанне гэтага пагаднення адкрые новую старонку ў развіцці супрацоўніцтва на карысць далейшага паступальнага інавацыйнага развіцця нашых дзяржаў - стратэгічных партнёраў.

ТАА "САМСЕ. Экалагічныя тэхналогіі" - спецыялізаваная кампанія па ахове навакольнага асяроддзя, заснаваная ААТ "Кітайская карпарацыя інжынірынгу САМС" для інтэграцыі высакаякасных рэсурсаў у галіне аховы навакольнага асяроддзя. Кампанія валодае прафесійнымі магчымасцямі, што аб'ядноўваюць праектаванне, НДДКР, вытворчасць абсталявання, інвестыцыі, будаўніцтва і эксплуатацыю ў сферы аховы навакольнага асяроддзя, канцэнтруе намаганні на пашырэнні дзейнасці ў галіне муніцыпальнага водазабеспячэння і водаадвядзення, ачысткі прамысловых сцёкавых вод, выдалення цвёрдых адходаў, энергазберажэння і кіравання цыклічным выкарыстаннем адходаў у якасці рэсурснай сыравіны, а таксама рацыянальнага выкарыстання навакольнага асяроддзя.

версія для друку

зрабіць стартавай

дабавіць у выбранае