Бізнес-навіны

У Мінску адкрыўся Беларускі прамыслова-інавацыйны форум

26 верасня, Мінск /Кар. БЕЛТА/. У Мінску адкрыўся Беларускі прамыслова-інавацыйны форум, перадае карэспандэнт БЕЛТА.

"У гэтым годзе мы традыцыйна праводзім кантактна-кааперацыйную біржу для малых і сярэдніх прадпрыемстваў, якія хочуць заключыць кантракты з прамысловымі вытворчымі прадпрыемствамі краіны. Сёння ў нас прысутнічаюць каля 50 прадстаўнікоў прадпрыемстваў з рэгіёнаў Расійскай Федэрацыі, а таксама іншых краін. Акрамя таго, у час форуму мы хочам высветліць і абмеркаваць, што перашкаджае развіццю вытворчай кааперацыі паміж малым і сярэднім бізнесам, а таксама прамысловымі прадпрыемствамі. Такім чынам, мы зможам актывізаваць і ўзмацніць гэта супрацоўніцтва. Адзначу, што дзякуючы кантактам, якія ўстанаўліваюцца на такіх пляцоўках, у далейшым рыхтуюцца і заключаюцца вытворчыя кантракты. Яны істотна ўплываюць на вытворчы працэс і дапамагаюць дасягнуць выпуску больш таннай, але пры гэтым якаснай прадукцыі", - падкрэсліў генеральны дырэктар Беларускага фонду фінансавай падтрымкі прадпрымальнікаў Пётр Арушаньянц.

Паводле яго слоў, прадпрыемствы прыходзяць падрыхтаванымі і нацэленымі на заключэнне дагавораў, атрыманне выгадных заказаў.

"Сёння на біржы чакаецца не менш за 200 вытворчых кантактаў, таму спадзяёмся, што большая частка зможа дамовіцца аб далейшым узаемадзеянні і супрацоўніцтве. Работа па садзейнічанні вытворчай кааперацыі даволі шматпланавая. Важна, каб тыя магчымасці, якія ёсць у прадпрыемстваў, былі ў поўнай меры рэалізаваны. Акрамя таго, дзякуючы новым кантактам прадпрыемствы атрымліваюць магчымасць на мясцовым рынку паспяхова, хутка і якасна забяспечыць свае патрэбнасці. Такім чынам, прадукцыя становіцца таннейшай і больш даступнай для спажыўца. А наша задача - выявіць і поўнасцю рэалізаваць патэнцыял вытворчага супрацоўніцтва", - сказаў гендырэктар Беларускага фонду фінансавай падтрымкі прадпрымальнікаў.

Ён адзначыў, што на форуме прадстаўлена шырокае кола прадпрыемстваў з розных галін. Пераважае машынабудаванне і лёгкая прамысловасць. "У нас сабраліся прадстаўнікі тых прадпрыемстваў, якія займаюцца непасрэдна вытворчасцю прадукцыі, у тым ліку прамежкавай, якая ўбудоўваецца ў вытворчыя ланцугі. Дзякуючы гэтаму з'яўляюцца больш складаныя і тэхнічна дасканалыя тавары", - рэзюмаваў Пётр Арушаньянц.

З 26 па 28 верасня ў Мінску праходзіць Беларускі прамыслова-інавацыйны форум. У яго праграму ўключаны выстаўка тэхналогій і інавацый у прамысловасці "ТэхІнаПрам", выстаўка абсталявання і тэхналогій для зваркі і рэзкі "Прафзварка", выстаўка хімічнай і нафтагазавай прамысловасці і навукі "Хімія. Нафта і газ", выстаўка абсталявання і тэхналогій для вытворчасці "Палімеры і кампазіты".

Таксама ў гэтыя дні пройдзе форум па лічбавай трансфармацыі рэальнага сектара эканомікі Smart Industry. На палях форуму адбудзецца 19-ы конкурс зваршчыкаў Беларусі. Акрамя таго, пройдзе эксклюзіўная выстаўка экспартных магчымасцей Ірана.

У бягучым годзе ў форуме прымуць удзел больш за 100 арганізацый з Беларусі, Мардовіі, Бранскай, Смаленскай, Новасібірскай абласцей Расіі, якія прадэманструюць абсталяванне і тэхналогіі для прамысловай вытворчасці, інавацыі і навукова-тэхнічныя распрацоўкі, прамысловую прадукцыю і паслугі. 

версія для друку

зрабіць стартавай

дабавіць у выбранае