Бізнес-навіны

У дэлегацыю Беларусі на Еўразійскім эканамічным форуме ў Бішкеку ўвойдуць 35 чалавек

Фота з архiва

24 мая, Масква /Эдуард Півавар - БЕЛТА/. У дэлегацыю Беларусі на Еўразійскім эканамічным форуме, які пройдзе ў Бішкеку 26 мая, увойдуць 35 чалавек. Аб гэтым сёння ў час відэамоста са сталіцамі краін Еўразійскага эканамічнага саюза паведаміў дырэктар Дэпартамента пратакола і арганізацыйнага забеспячэння Еўразійскай эканамічнай камісіі Даніяр Турусбекаў, перадае карэспандэнт БЕЛТА.

У склад беларускай дэлегацыі ў вочным фармаце ўвойдуць кіраўнікі міністэрстваў энергетыкі, транспарту і камунікацый, антыманапольнага рэгулявання і гандлю, прадстаўнікі Дзяржаўнага мытнага камітэта, Беларускай універсальнай таварнай біржы, а таксама кіраўнікі Белдзяржуніверсітэта і Беларускага дзяржаўнага эканамічнага ўніверсітэта. У анлайн-фармаце плануецца ўдзел у форуме кіраўнікоў дзяржаў Еўразійскага эканамічнага саюза. У мерапрыемстве будуць таксама ўдзельнічаць віцэ-прэм'еры - члены Савета Еўразійскай эканамічнай камісіі, а таксама члены Калегіі ЕЭК.

На форум запрошаны кіраўнікі бізнесу, у тым ліку буйнога, з краін ЕАЭС. З краін далёкага замежжа будуць удзельнічаць прадстаўнікі дзяржаў Лацінскай Амерыкі і Паўднёва-Усходняй Азіі. Усяго ўдзел у форуме пацвердзілі больш за 2,5 тыс. чалавек.

"Форум трансфармаваўся з "Еўразійскага тыдня" - міжнароднага форуму, які раней праводзіла ЕЭК. У 2019 годзе ў адпаведнасці з рашэннем кіраўнікоў дзяржаў быў заснаваны Еўразійскі эканамічны форум. У 2020-2021 гадах з-за пандэміі не было магчымасці яго праводзіць", - адзначыў Даніяр Турусбекаў.

Форум уключае больш за тры дзясяткі мерапрыемстваў. На панэльных сесіях абмяркуюць перспектывы стратэгічнага развіцця еўразійскай інтэграцыі ў эпоху глабальных змяненняў, пытанні фінансавага развіцця і макраэканамічнай стабільнасці, актывізацыі дзейнасці ў энергетычнай і транспартнай сферах, лічбавізацыі, а таксама сітуацыю ў прамысловасці краін ЕАЭС. Акрамя таго, запланавана работа 21 тэматычнай секцыі.

Па выніках форуму плануецца падпісаць 10 дакументаў у розных сферах супрацоўніцтва. "У прыватнасці, мемарандум аб супрацоўніцтве ў галіне развіцця турыстычнай галіны. Асобнае пагадненне плануецца падпісаць па выніках сустрэчы рэктараў ВНУ ЕАЭС. Яно будзе прысвечана стварэнню кансорцыума паміж вышэйшымі навучальнымі ўстановамі", - удакладніў Даніяр Турусбекаў.

версія для друку

зрабіць стартавай

дабавіць у выбранае