Бізнес-навіны

У Беларусі і Расіі пашыраць узаемную практыку выкарыстання плацежных сістэм "Мір" і "Белкарт"

Фота з архiва

11 жніўня, Масква /Эдуард Півавар - БЕЛТА/. У Беларусі і Расіі пашыраць узаемную практыку выкарыстання нацыянальных плацежных сістэм "Мір" і "Белкарт". Аб гэтым БЕЛТА паведамілі ў Пастаянным камітэце Саюзнай дзяржавы па выніках праведзенага 9 жніўня пасяджэння Групы высокага ўзроўню Савета Міністраў Саюзнай дзяржавы.

"Падтрымана пашырэнне практыкі выкарыстання плацежных сістэм "Мір" і "Белкарт" у Расійскай Федэрацыі і Рэспубліцы Беларусь", - адзначылі ў Пастаянным камітэце.

Група высокага ўзроўню разгледзела шырокае кола пытанняў беларуска-расійскага супрацоўніцтва. У іх ліку - аб парадку прызнання электроннага лічбавага подпісу (электроннага подпісу) у электронным дакуменце і забеспячэння юрыдычнай сілы электронных дакументаў пры трансгранічным інфармацыйным узаемадзеянні ў рамках Саюзнай дзяржавы; аб супрацоўніцтве Беларусі і РФ у галіне мікраэлектронікі і ўмовах прымянення электроннай кампанентнай базы беларускай вытворчасці ў Расіі, аб стварэнні адзінай сістэмы вызначэння ўзроўню лакалізацыі аўтамабільнай і спецыялізаванай тэхнікі, што вырабляецца ў дзвюх краінах.

"Асабліва варта адзначыць пытанні, якія закранаюць інтарэсы значнай часткі грамадзян дзвюх краін, напрыклад, узаемнае прызнанне дакументаў аб вакцынацыі супраць COVID-19 у Рэспубліцы Беларусь і Расійскай Федэрацыі", - падкрэслілі ў Пастаянным камітэце.

Значная работа была праведзена ў час двухбаковых кансультацый і ўрэгулявання пытанняў узаемадзеяння аператараў электрасувязі Беларусі і Расіі ў рамках адмены роўмінгу на тэрыторыі Саюзнай дзяржавы. "З лістапада мінулага года камфортныя (паніжаныя) тарыфы на паслугі сувязі дзейнічалі ў тэставым рэжыме, - нагадалі ў Пастаянным камітэце. - Цяпер профільныя міністэрствы дзвюх краін і аператары сувязі павінны хутка перайсці ад доследнай эксплуатацыі каналаў сувязі да работы ва ўмовах зніжаных ставак і камфортных абаненцкіх роўмінгавых тарыфаў на прасторы Саюзнай дзяржавы".

Пасяджэнне Групы высокага ўзроўню ў рэжыме відэаканферэнцыі прайшло пад кіраўніцтвам яе сустаршыняў пасла Беларусі ў Расіі (надзеленага паўнамоцтвамі намесніка прэм'ер-міністра Беларусі) Уладзіміра Сямашкі і віцэ-прэм'ера Расіі Аляксея Аверчука. У ім таксама прынялі ўдзел дзяржаўны сакратар Саюзнай дзяржавы Дзмітрый Мезенцаў, пасол Расіі ў Беларусі Яўген Лук'янаў, кіраўнікі органаў выканаўчай улады Беларусі і РФ, супрацоўнікі Пастаяннага камітэта Саюзнай дзяржавы.

версія для друку

зрабіць стартавай

дабавіць у выбранае