Бізнес-навіны

Турызм і пастаўкі грузавой тэхнікі. Па якіх напрамках супрацоўнічаюць Беларусь і Карэлія

Фота з архiва

21 снежня, Мінск /Кар. БЕЛТА/. Беларусь развівае з Карэліяй такія напрамкі супрацоўніцтва, як пастаўкі грузавой тэхнікі і турызм. Аб гэтым заявіў міністр лясной гаспадаркі Аляксандр Кулік на сустрэчы з кіраўніком Рэспублікі Карэлія Артурам Парфенчыкавым, перадае карэспандэнт БЕЛТА.

"Паміж Беларуссю і Карэліяй наладжана добрае супрацоўніцтва, якое з кожным годам прадаўжае развівацца. Заходнія санкцыі падштурхоўваюць нас да сумеснай работы па ўсіх напрамках дзейнасці. Так, тры гады таму мы і не марылі аб тавараабароце $102,6 млн, калі ў 2020 годзе ён быў на ўзроўні $38 млн", - сказаў Аляксандр Кулік.

Паводле яго слоў, у шэсць разоў выраслі пастаўкі беларускай грузавой тэхнікі, у прыватнасці вытворчасці БЕЛАЗ і МАЗ. "Ёсць планы па пастаўцы лесанарыхтоўчай тэхнікі ў Карэлію. Напрыклад, прадпрыемства "АМКАДОР" дынамічна ўдасканальваецца ў гэтай галіне. Чакаецца пастаўка 54 машын, што з'яўляецца сур'ёзным штуршком для далейшага развіцця дзелавых адносін", - падкрэсліў міністр лясной гаспадаркі. Карэлія ж пастаўляе ў Беларусь будматэрыялы, у прыватнасці граніт.

"Патэнцыял для супрацоўніцтва не вычарпаны. У перспектыве хочам развіваць турыстычны напрамак. У Карэліі пабывалі ўжо групы паляўнічых па паляванні на глушца і мядзведзя. У Беларусі таксама ёсць што паказаць. Рады, што ў нас ёсць рост па ўсіх напрамках дзейнасці", - рэзюмаваў Аляксандр Кулік.

Заўтра плануецца правядзенне сёмага пасяджэння рабочай групы па развіцці супрацоўніцтва паміж Беларуссю і Карэліяй, дзе будзе абмяркоўвацца далейшае ўзаемадзеянне ў розных галінах.

версія для друку

зрабіць стартавай

дабавіць у выбранае