Бізнес-навіны

Цэх па пашыве вырабаў з натуральнага футра ў Белкаапсаюзе мае намер нарасціць аб'ёмы вытворчасці

11 снежня, Мінск /Кар. БЕЛТА/. Цэх па пашыве вырабаў з натуральнага футра ў сістэме Белкаапсаюза плануе нарасціць аб'ёмы вытворчасці, паведаміў журналістам намеснік прэм'ер-міністра Беларусі Леанід Заяц пасля нарады пад кіраўніцтвам старшыні Савета Рэспублікі Наталлі Качанавай, перадае карэспандэнт БЕЛТА.

На сёння ў пашывачным цэху працуюць 17 чалавек. Футравыя вырабы шыюць з сыравіны, якую атрымліваюць у зверагаспадарках Белкаапсаюза. "Мы бачым, што цяпер неэфектыўна працуе прадпрыемства і прынята рашэнне яго дагрузіць", - сказаў Леанід Заяц.

У прыватнасці, вырашана далучыць работнікаў, што заняты ў швейным цэху, да "Гроднакаапфутра". Размова ідзе пра аб'яднанне з прадпрыемствам, якое вырабляе сыравіну для гэтага цэха. Прычым плануецца павялічыць загрузку, у тым ліку за кошт павелічэння колькасці работнікаў.

"17 чалавек, якія працуюць цяпер, шыюць прыкладна 250 вырабаў за год. Каб выйсці на прыбытковую работу і забяспечыць унутранае спажыванне вырабаў з натуральнага футра, прынята рашэнне на працягу трох месяцаў іх перабазіраваць у цэнтр Мінска. Стварыць там прадпрыемства на 34 чалавекі, павялічыць магутнасці і выйсці на выраб у аб'ёме 400 штук. Гэта дасць магчымасць, безумоўна, загрузіць магутнасці і забяспечыць у далейшым паступленне выручкі", - адзначыў намеснік прэм'ер-міністра.

Паводле яго слоў, у плане продажу важна забяспечыць гібкасць, напрыклад, выйсці на растэрміноўку плацяжу. "Палічым, на які перыяд можна даць растэрміноўку нашым грамадзянам, з тым разлікам, каб тавар не залежваўся, а рухаўся. І не толькі ўнутры рэспублікі, але і за межы краіны", - абазначыў Леанід Заяц.

Ён заўважыў, што сёння да беларускіх вырабаў з футра ёсць цікавасць з боку кітайскіх спажыўцоў.

Намеснік прэм'ер-міністра звярнуў увагу, што Беларусь цяпер мае асноўны аб'ём норкі. Сітуацыя з кавідам прымусіла многія краіны закрыць адпаведныя вытворчасці. "Мы захавалі, развілі, выйшлі на зададзеныя бізнес-планам параметры", - сказаў ён. Частка шкурак норкі будзе рэалізавана на ўнутраным рынку (для пашыву вырабаў), астатняе прададуць за межы краіны. "Бачым, што ў гэтым годзе ўпершыню на працягу апошніх 12 гадоў зверагаспадаркі рэспублікі будуць генерыраваць прыбытак", - падкрэсліў ён.

Як адзначыла начальнік упраўлення па вытворчасці і рэалізацыі вырабаў з натуральнага футра ўнітарнага прадпрыемства "Гроднакаапфутра" Ірына Козырава, у калектыве працуюць унікальныя спецыялісты. "Некалі нас было значна больш, мы выраблялі шмат прадукцыі, якая пастаўлялася не толькі на ўнутраны рынак, але і за межы Беларусі. На сёння сітуацыя крыху пагоршылася, вельмі шмат людзей пайшло. Але дзякуючы ўмяшанню вышэйшых службовых асоб сітуацыя, я спадзяюся, зменіцца", - адзначыла яна.

Начальнік упраўлення падкрэсліла, што спецыялісты вытворчасці сапраўды ўнікальныя, яны неаднаразова займалі вышэйшыя месцы ў міжнародных дызайнерскіх конкурсах работ па футры. "Хацелася б, каб нашы вырабы зноў радавалі і беларускіх пакупніц, і пакупніц з-за мяжы", - сказала яна.

Паводле слоў Ірыны Козыравай, вытворчасць прайшла рэарганізацыю, у горадзе плануецца выдзеліць пляцоўку. "Будзем спадзявацца, што гэта новы віток, новы крок для нашай вытворчасці. І мы будзем развівацца і будзем радаваць нашых пакупніц", - сказала яна на заканчэнне.

Нарада прайшла перад сустрэчай старшыні Савета Рэспублікі з працоўным калектывам упраўлення па вытворчасці і рэалізацыі вырабаў з натуральнага футра УП "Гроднакаапфутра".

версія для друку

зрабіць стартавай

дабавіць у выбранае