Бізнес-навіны

Ці пагражае Беларусі перагрэў эканомікі? Прэм'ер-міністр даў дакладны адказ

7 жніўня, Быхаўскі раён /Кар. БЕЛТА/. Прэм'ер-міністр Раман Галоўчанка ў час рабочага візіту ў Магілёўскую вобласць расказаў, чаму беларускай эканоміцы не пагражае перагрэў, перадае карэспандэнт БЕЛТА.

На фоне навін аб тым, што расійскай эканоміцы можа пагражаць перагрэў, асобныя беларускія так званыя эксперты сталі сцвярджаць, што і беларускай эканамічнай мадэлі можа пагражаць такая з'ява.

"Расійская Федэрацыя сваю эканамічную палітыку вядзе самастойна. Мы сваю таксама вядзём самастойна. У Расіі крыху іншая структура бюджэтных расходаў. Тое што так званыя эксперты палохаюць перагрэвам эканомікі - каменціраваць складана. Таму што з таго боку ўсе эканамічныя навіны падаюцца выключна ў негатыўным ключы, разлічваючы на людзей, якія не вельмі разбіраюцца ў эканамічных мадэлях, - падкрэсліў прэм'ер-міністр. - У іх навінах заўсёды ідзе негатыўная канатацыя: у Беларусі выраслі зарплаты - "эксперт" тлумачыць, чаму гэта дрэнна, у Беларусі павялічыўся аб'ём вытворчасці - "эксперт" тлумачыць, чым гэта пагражае і гэтак далей".

Што датычыцца перагрэву эканомікі, прэм'ер-міністр запэўніў, што нашай краіне такая з'ява не пагражае.

"Перагрэў - гэта эканамічная катэгорыя, якая абазначае сітуацыю, пры якой рост ВУП перавышае патэнцыяльны. Так выглядае першы сімптом, - адзначыў Раман Галоўчанка. - Другі сімптом: актыўны рост заработных плат і грошы накіроўваюцца на спажыванне. Гэта ўсё выклікае дысбаланс".

Раман Галоўчанка адзначыў, што ўсе рашэнні, якія прымаюцца ў эканамічнай палітыцы нашай краіны, улічваюць і рызыку надыходу негатыўных наступстваў. "Я вас запэўніваю, што ў эканамічным блоку ўрада, нашай банкаўскай сістэме працуюць вельмі прафесійныя людзі, якія цудоўна ўсё гэта ведаюць і разумеюць", - сказаў ён.

Прэм'ер-міністр адзначыў, што ў Беларусі ідзе рост заработнай платы, аб'ёмаў вытворчасці, крэдытавання, які знаходзіцца ў абсалютна дапушчальных параметрах. "Нашымі адпаведнымі эканамічнымі службамі вядзецца пастаянны маніторынг. Ёсць матрыца, якая выкарыстоўвае ўсе міжнародна адобраныя падыходы па маніторынгу за так званым перагрэвам эканомікі. У ёй змешчана 80 параметраў, па якіх нашы службы вядуць назіранне, - падкрэсліў Раман Галоўчанка. - Таму магу запэўніць, што ўсе гэтыя параметры знаходзяцца ў зялёнай зоне. Ніякай рызыкі на гэты момант мы не бачым".

Чужыя заявы аб тым, што ў Беларусі шмат грошай і яны прадаўжаюць друкавацца - неабгрунтаваныя. "Гэта сведчыць аб нізкім узроўні разумення эканамічных працэсаў асобнымі людзьмі", - падкрэсліў ён.

Каэфіцыент манетызацыі беларускай эканомікі даволі невысокі. "У нашай эканоміцы магло б быць яшчэ больш грошай, але пакуль мы не бачым патрэбы ў дадатковай крэдытнай падтрымцы банкаўскай сістэмы", - рэзюмаваў Раман Галоўчанка.

версія для друку

зрабіць стартавай

дабавіць у выбранае