Бізнес-навіны

Італія разлічвае на эфектыўнае супрацоўніцтва з Беларуссю ў рэалізацыі праекта Шаўковага шляху

29 красавіка, Мінск /Кар. БЕЛТА/. Італія разлічвае на эфектыўнае супрацоўніцтва з Беларуссю ў рэалізацыі глабальнай ініцыятывы Шаўковага шляху. Аб гэтым заявіла намеснік старшыні Сената Італіі Паола Таверна на сустрэчы з намеснікам старшыні Савета Рэспублікі Мар'янай Шчоткінай, паведамілі ў прэс-службе верхняй палаты парламента.

"Я ўпэўнена, што ў рамках праекта Шаўковага шляху нашы адносіны могуць атрымаць новы імпульс і далейшае развіццё", - адзначыла Паола Таверна. Паводле яе слоў, існуючы паміж краінамі ўзровень узаемнага гандлю з'яўляецца добрай асновай для далейшага ўмацавання беларуска-італьянскага супрацоўніцтва.

У сваю чаргу Мар'яна Шчоткіна адзначыла, што ў 2018 годзе тавараабарот паміж краінамі склаў амаль $913 млн, што на 15 працэнтаў больш да ўзроўню 2017 года. Аднак гэта далёка не мяжа, падкрэсліла яна. На тэрыторыі Беларусі дзейнічае 263 прадпрыемствы з італьянскім капіталам. "Мы зацікаўлены ў тым, каб іх колькасць расла, каб развівалася наша інвестыцыйнае супрацоўніцтва, рэалізоўваліся сумесныя праекты", - падкрэсліла намеснік старшыні Савета Рэспублікі.

Асаблівая ўвага ў час перагавораў удзелена ўзаемадзеянню дзвюх краін у гуманітарнай сферы. Мар'яна Шчоткіна падзякавала італьянскаму боку за падтрымку Беларусі ў перыяд пасля аварыі на Чарнобыльскай АЭС. "Нашай краіне была аказана вельмі вялікая падтрымка і дапамога - амаль 90 тыс. беларускіх дзяцей прайшлі аздараўленне ў Італіі", - нагадала яна.

Мар'яна Шчоткіна выказала ўпэўненасць у тым, што сувязі паміж краінамі будуць у далейшым паспяхова развівацца, у тым ліку за кошт міжпарламенцкага супрацоўніцтва. "Міжпарламенцкі дыялог садзейнічае ўмацаванню дружбы паміж нашымі краінамі, пашырэнню гандлёва-эканамічнага супрацоўніцтва, рэалізацыі сумесных праектаў", - рэзюмавала яна.

версія для друку

зрабіць стартавай

дабавіць у выбранае