Бізнес-навіны

"Свет ламаецца на калена, а мы тут разважаем". Лукашэнка гатовы даць кіраўнікам у АПК любыя паўнамоцтвы

18 сакавіка, Глыбокае /Кар. БЕЛТА/. Прэзідэнт Беларусі Аляксандр Лукашэнка падкрэслівае, што цяпер складваецца цудоўны момант для развіцця сельскай гаспадаркі і экспарту прадуктаў харчавання. Аб гэтым ён заявіў на нарадзе па пытаннях развіцця аграпрамысловых аб'яднанняў Віцебскай вобласці, перадае карэспандэнт БЕЛТА.

Указ, які датычыцца пытанняў стварэння і функцыянавання такіх аб'яднанняў, быў прыняты ўжо два гады таму - у лютым 2020 года. Як далажылі чыноўнікі, пэўныя вынікі ёсць: удалося знізіць даўгавую нагрузку, вырашаюцца пытанні матэрыяльна-тэхнічнага аснашчэння, разгорнута маштабнае будаўніцтва новых аб'ектаў на фермах (праўда, многія з іх пакуль яшчэ ў стадыі завяршэння, або не загружаны жывёлай), прымаецца шэраг крокаў для вырашэння кадравых праблем. Тым не менш праблемныя пытанні ў многім застаюцца. Перш за ўсё, пакуль няма належнай фінансавай аддачы, магутнасці шэрага прадпрыемстваў недазагружаны. У гэтай сітуацыі чыноўнікі запэўніваюць, што для прыкметнага эфекту трэба яшчэ крыху часу - дабудаваць пачатае і загрузіць пабудаваныя ўжо аб'екты, а таксама вырашэнне шэрага фінансавых і кадравых пытанняў.

"Не дай бог у гэтым годзе не будзе зрухаў. Вы хочаце нейкіх дадатковых правоў, паўнамоцтваў, - бярыце любыя. Як той Ельцын (першы прэзідэнт РФ Барыс Ельцын. - Заўвага БЕЛТА) гаварыў: колькі праглыняце, пацягнеце, столькі і бярыце", - падкрэсліў беларускі лідар.

Ён адзначыў, што без "вёскі" ў Віцебскай вобласці нічога не будзе. "Але і вёсцы таксама трэба пачынаць варушыцца!" - заўважыў кіраўнік дзяржавы.

"Цяпер свет ламаецца на калена, ідзе перадзел свету, а мы тут разважаем, - заявіў Аляксандр Лукашэнка. - Самае галоўнае - дайце кіраўнікам права прымаць рашэнні. У тым ліку і кадравыя. Цяпер момант такі. Момант цяжкі, але ў той жа час шыкарны момант. Расія адкрыта. Нам адкрываецца цудоўная магчымасць. І грошы добрыя. Нас расійскі рубель што, не задавальняе? Задавальняе. Мы можам паліва купіць, сыравіну, рэсурсы. Для сельскай гаспадаркі лепшага часу не будзе".

Прэзідэнт упэўнены, што беларускія прадукты харчавання будуць запатрабаваны і ва Украіне: "Вайна закончыцца ва Украіне. Там жа ўсё разбіта. Ці пасеюць яны яшчэ ў гэтым годзе. Таксама трэба людзей карміць - 40 мільёнаў. Мы і так на $7 млрд там гандлявалі (аб'ём двухбаковага гандлю. - Заўвага БЕЛТА). Прадавай, калі ласка".

"А мы ў Віцебску нешта чакаем: прыедзе цяпер Прэзідэнт, прывязе "навагоднія падарункі" ў мяшку. Мікалай Мікалаевіч (у нарадзе прымаў удзел экс-губернатар Віцебскай вобласці Мікалай Шарснёў, які раней ініцыяваў стварэнне аграпрамысловых аб'яднанняў. - Заўвага БЕЛТА), закончыўся Новы год", - падкрэсліў беларускі лідар.

У цэлым Прэзідэнт Беларусі ўпэўнены, што сістэма такіх аб'яднанняў прыдатная і можа існаваць. Больш таго, гэта па сутнасці ніякая не навінка, аб'яднанне вытворчасцей сыравіны, перапрацоўкі і гандлю прадукцыяй, як правіла, прыносіць чаканы станоўчы фінансавы вынік: "Таму вось гэта першы крок (аб'яднанне вытворчасцей сыравіны і перапрацоўкі. - Заўвага БЕЛТА). Падключаеце гандаль - канчатковы варыянт. Гэта нармальная сістэма, якая павінна была даць вынік".

версія для друку

зрабіць стартавай

дабавіць у выбранае