Бізнес-навіны

Сівак: тавараабарот паміж Беларуссю і Кыргызстанам расце, плануем развіваць і прамкааперацыю

24 жніўня, Мінск /Кар. БЕЛТА/. Тавараабарот паміж Беларуссю і Кыргызстанам расце, плануецца развіваць і прамкааперацыю. Аб гэтым паведаміў намеснік прэм'ер-міністра Беларусі Анатоль Сівак у час пасяджэння міжурадавай беларуска-кыргызскай камісіі па гандлёва-эканамічным супрацоўніцтве, перадае карэспандэнт БЕЛТА.

"Беларуска-кыргызскае ўзаемадзеянне прыкметна актывізавалася. Мы завяршылі 2022 год з добрымі паказчыкамі ўзаемнага гандлю. Тавараабарот перавысіў $160 млн і павялічыўся ў параўнанні з 2021 годам на 65 працэнтаў. У 2023 годзе дадатная дынаміка ва ўзаемным гандлі захоўваецца ў тым ліку за кошт істотнага росту паставак з Кыргызстана. За першае паўгоддзе мы прыбавілі $19 млн і разлічваем захаваць зададзеныя тэмпы", - сказаў Анатоль Сівак.

Ён адзначыў, што сумеснымі намаганнямі ўдалося ажыццявіць шэраг дамоўленасцей і ідэй, якія былі прадметам абмеркавання на папярэднім пасяджэнні міжурадавай камісіі і ў час Беларуска-кыргызскага бізнес-форуму. "У якасці станоўчага прыкладу хачу адзначыць арганізацыю сумеснага выпуску ліфтавага абсталявання ААТ "Магілёўліфтмаш" на пляцоўцы кыргызскага завода. Ступень лакалізацыі вытворчасці менш як за год дасягнула 25 працэнтаў. Вытворчы план на бягучы год складае 100 ліфтаў, ён выконваецца па графіку. Лічу, што гэта добры паказчык, які сведчыць аб наяўнасці патэнцыялу развіцця кааперацыйных праектаў у Кыргызстане", - адзначыў віцэ-прэм'ер.

Акрамя таго, наладжаны кантакты па пытанні лакалізацыі вытворчасці грузавых вагонаў на плошчах Кыргызскіх чыгунак. "Аднак тут нашы прадпрыемствы толькі ў пачатку дарогі. Спадзяёмся, што іх вопыт узаемадзеяння таксама будзе рэзультатыўным", - дадаў Анатоль Сівак.

Ён таксама падкрэсліў, што ўзаемная зацікаўленасць ў лібералізацыі міжнародных грузаперавозак дала магчымасць падпісаць змяненні ў міжурадавае пагадненне аб міжнародных аўтамабільных зносінах. Гэтыя змяненні прадугледжваюць пераход на бездазвольную аснову выканання перавозчыкамі абедзвюх дзяржаў міжнародных аўтамабільных перавозак грузаў у/з трэціх краін. Цяпер усе віды міжнародных аўтамабільных перавозак грузаў і нерэгулярныя перавозкі пасажыраў паміж Беларуссю і Кыргызстанам будуць выконвацца без дазволаў.

Віцэ-прэм'ер паведаміў, што было падпісана базавае пагадненне, якое прадугледжвае адкрыццё Банкам развіцця крэдытнай лініі кыргызскаму банку для фінансавання беларускіх паставак у Кыргызстан. "Заклікаю выкарыстоўваць гэту новую магчымасць для нарошчвання ўзаемнага тавараабароту", - сказаў ён.

У чэрвені 2023 года ўпершыню ў Кыргызстане прайшлі Дні культуры Беларусі. "Гэта стала значнай падзеяй у культурным жыцці кыргызскай сталіцы і добрым падарункам да 30-годдзя дыпламатычных адносін паміж нашымі дзяржавамі. Чакаем, што ў наступным годзе кыргызскія майстры мастацтваў парадуюць сваёй творчасцю мінчан", - адзначыў Анатоль Сівак.

Сярод іншых перспектыўных напрамкаў двухбаковага супрацоўніцтва ён назваў перапрацоўку цвёрдых бытавых адходаў, удзел беларускіх прадпрыемстваў у будаўніцтве чыгуначнай інфраструктуры ў Кыргызстане, распрацоўку горадабудаўнічай дакументацыі. "Не павінны застацца без абмеркавання і традыцыйныя сферы нашага ўзаемадзеяння - пастаўкі беларускай тэхнікі, сельская гаспадарка, ахова здароўя, турызм", - рэзюмаваў віцэ-прэм'ер.

версія для друку

зрабіць стартавай

дабавіць у выбранае