Бізнес-навіны

Сухое малако на Кубу і тэхніка ў Нікарагуа. Пасол расказаў аб напрамках беларускага экспарту

Фота з архiва

31 ліпеня, Мінск /Кар. БЕЛТА/. У эфіры тэлеканала "СТБ" Надзвычайны і Паўнамоцны Пасол Рэспублікі Беларусь у Рэспубліцы Куба Валерый Бараноўскі расказаў аб экспарце беларускай прадукцыі на Кубу і ў іншыя краіны, паведамляе БЕЛТА.

Каменціруючы заявы аб павелічэнні сумеснага тавараабароту паміж Кубай і Беларуссю, Валерый Бараноўскі адзначыў: "У нас ёсць пагадненне аб узаемных пастаўках, у адпаведнасці з якім мы, каб пазбегнуць аплаты грашовымі сродкамі, пастаўляем Кубе тавары на нейкую суму, і яны нам пастаўляюць на гэту ж суму назад".

Пасол звярнуў увагу на ўзаемадзеянне краін у фармакалагічнай сферы. "У гэтым напрамку мы развіваемся без перапынку. Пастаянна ідзе абмен дэлегацыямі, рэгістрацыя лякарстваў, абмен механізмамі, працуюць розныя прадпрыемствы. Нядаўна зарэгістравалі два нашы медыцынскія сродкі на Кубе". Ён таксама падкрэсліў, што беларуская малочка будзе запатрабавана на Кубе. "Любая малочная прадукцыя ідзе на ўра. Цяпер кантракт першы, ужо, можа, адгружаецца першая партыя сухога малака на Кубу. Дойдзе месяцы праз тры-чатыры. Паглядзім, як будзе працаваць механізм".

Валерый Бараноўскі адзначыў, што Беларусь пачала ўжо ўзаемадзеянне з Нікарагуа. "Будзе падпісаны кантракт на пастаўку 15 аўтамабіляў МАЗ для муніцыпалітэта горада Манагуа. "АМКАДОР" мае планы, трактарны завод мае свае планы па пастаўцы трактароў. Цяпер мы знаходзімся на рэалізацыі першага гэтага праекта, тэхнікі на $1 млн. Патэнцыял, вядома, вялізны. Уявіце, яны пасябравалі з Кітаем. Раней там была праблема з-за Тайваня. Падпісалі з імі пагадненне аб абмене тавараў бяспошлінна, у асноўным пастаўляе Кітай прадукты харчавання. І, як прыклад, у Нікарагуа вельмі ўрадлівая зямля. Толькі 44-45 працэнтаў зямлі апрацоўваецца. Гэта значыць 50 працэнтаў урадлівых зямель не апрацоўваецца, таму што не хапае тэхнікі і не хапае людзей. Урад краіны, мне здаецца, рухаецца ў правільным напрамку. Пабудавалі 4 тыс. км дарог", - дадаў ён.

Пасол таксама заявіў, што разглядаецца пытанне паставак у Нікарагуа беларускай тэхнікі. "Усё гэта ў перспектыве. У прынцыпе, кіраўніцтва краіны, Артэга (Прэзідэнт Рэспублікі Нікарагуа. - Заўвага БЕЛТА) і яго каманда, робяць правільныя рэчы - адыходзяць ад залежнасці ад адной дзяржавы. Цяпер, як бы ні здавалася парадаксальна, асноўны экспарцёр, імпарцёр і інвестар - гэта ЗША", - сказаў на заканчэнне ён.

версія для друку

зрабіць стартавай

дабавіць у выбранае