Бізнес-навіны

Сума здзелак расійскіх кампаній на БУТБ за студзень-красавік 2024 года вырасла ў чатыры разы

Фота з архiва

6 мая, Мінск /Кар. БЕЛТА/. У студзені-красавіку 2024 года сума здзелак рэзідэнтаў Расійскай Федэрацыі на Беларускай універсальнай таварнай біржы (БУТБ) дасягнула $259,4 млн, што ў чатыры разы больш, чым за аналагічны перыяд мінулага года. Ключавым драйверам росту сталі актыўныя продажы беларускай прадукцыі АПК на рынак РФ, паведамілі карэспандэнту БЕЛТА ў прэс-службе біржы.

Як расказалі ў прэс-службе БУТБ, у параўнанні са студзенем-красавіком 2023 года экспарт тавараў сельскагаспадарчай групы ў Расію павялічыўся ў вартасным выражэнні ў 59 разоў. Найбольшым попытам у расійскіх удзельнікаў біржавых таргоў карысталіся айчынныя малакапрадукты - перш за ўсё сметанковае масла, сухое малако, сыры і тварог, а таксама кармавыя дабаўкі вытворчасці Беларускай нацыянальнай біятэхналагічнай карпарацыі. Што датычыцца імпарту, то праз біржу ў Беларусь традыцыйна пастаўляліся збожжавыя культуры, чорныя і каляровыя металы, металавырабы, вугаль і кокс.

"У гэтым годзе асабліва актыўна магчымасці біржавой пляцоўкі выкарыстоўваюць кампаніі з Маскоўскай, Ленінградскай, Смаленскай, Яраслаўскай і Калінінградскай абласцей, і гэта непасрэдным чынам адлюстроўваецца на дынаміцы аб'ёмаў здзелак. Напрыклад, па Маскве і Маскоўскай вобласці паказчык тавараабароту па выніках першых чатырох месяцаў года вырас больш як у 10 разоў, па Санкт-Пецярбургу і Ленінградскай вобласці - у 3,5 раза, а па Смаленскай вобласці - у 2,4 раза. Пры гэтым у залежнасці ад рэгіёна таварная структура здзелак адрозніваецца. У прыватнасці, у гандлі з Маскоўскай вобласцю пераважае прадукцыя сельскай гаспадаркі і будматэрыялы. Удзельная вага гэтых таварных катэгорый у агульнай суме транзакцый складае 88 працэнтаў. Для параўнання, у гандлі з Калінінградскай вобласцю львіная доля здзелак прыпадае на прадукцыю металургіі і дрэваапрацоўкі. Па крытэрыі "экспарт-імпарт" таксама ёсць рэгіянальныя асаблівасці. Скажам, Ліпецкая вобласць цяпер з'яўляецца нета-экспарцёрам. У 2024 годзе гэты рэгіён толькі рэалізуе збожжа на беларускі рынак, не купляючы ніякіх беларускіх тавараў праз біржу. А вось Стаўрапольскі край, наадварот, толькі імпартуе беларускія піламатэрыялы. У сувязі з гэтым пастаянна вядзецца работа па прыцягненні на таргі новых прадаўцоў і пакупнікоў з Расіі для забеспячэння больш збалансаванай структуры ўзаемнага гандлю", - пракаменціравалі ў прэс-службе беларускай біржы.

Паводле даных БУТБ, у 2024 годзе здзелкі на біржавой гандлёвай платформе заключалі кампаніі з 43 рэгіёнаў Расіі, а колькасць акрэдытаваных рэзідэнтаў РФ вырасла з пачатку года на 6 працэнтаў і на гэты час складае 3823.

версія для друку

зрабіць стартавай

дабавіць у выбранае