Бізнес-навіны
Створаная ў Беларусі крыптабіржа пачне працаваць у поўным фармаце ў II квартале
12 красавіка, Мінск /Кацярына Крышэнік - БЕЛТА/. Створаная ў Беларусі біржа крыптавалют пачне працаваць у поўным фармаце ў другім квартале гэтага года. Праект крыптабіржы быў прадстаўлены сёння на выстаўцы распрацовак вядучых кампаній - рэзідэнтаў ПВТ, якую наведаў Прэзідэнт Беларусі Аляксандр Лукашэнка, перадае карэспандэнт БЕЛТА.
Як расказаў журналістам дырэктар па развіцці кампаніі Currency.com Дзмітрый Агіевіч, цяпер крыптабіржа працуе ў тэставым рэжыме, у фармаце закрытага рэліза. "Яе запусцілі 15 студзеня гэтага года, каб паказаць прадукт аўдыторыі, атрымаць зваротную сувязь, а потым унесці дапрацоўкі. У цэлым рэліз вельмі паспяховы, - сказаў Дзмітрый Агіевіч. - У першыя два тыдні ў чарзе на рэгістрацыю ў нас было больш за 100 тыс. чалавек. Ёсць вялікі інтарэс да гэтай тэмы. Рыхтуемся да публічнага рэліза на ўвесь свет".
Паводле яго слоў, лідары біржавой індустрыі станоўча адазваліся аб крыптавалютной біржы, распрацаванай у Беларусі. "Былі вельмі пазітыўныя публікацыі ў сусветных СМІ аб нашай краіне. Гаварылася, што менавіта ў нас створана самае сучаснае прававое поле для лічбавых актываў", - падкрэсліў ён. Удзельнікамі біржы ўжо сталі інвестары не толькі з краін СНД, але таксама з Заходняй Еўропы.
Галоўная перавага біржы ў тым, што яна з'яўляецца своеасаблівым мостам паміж светам традыцыйных фінансаў і светам лічбавых валют. "Калі ў вас у руках лічбавая валюта, то вы, зарэгістраваўшыся на крыптабіржы, атрымліваеце доступ да куплі акцый, напрыклад Apple, іншых кампаній і наадварот. Вы можаце прыйсці са звычайнымі грашамі і атрымаць доступ да гандлю лічбавымі валютамі. Усё гэта цалкам легальна і, што вельмі важна, празрыста. Наша мэта - дапамагчы інвестарам, простым людзям у гэтым разабрацца, зразумець, у чым рызыкі, і забяспечыць абсалютную празрыстасць", - растлумачыў эксперт.
Што датычыцца прадпрыемстваў, кампаній, то яны таксама выказваюць вялікі інтарэс да біржы. Яна адкрывае для іх вялікія магчымасці для прыцягнення інвестыцый. Яны могуць выпускаць на платформе крыптабіржы токены - лічбавыя аналагі традыцыйных акцый. "Прадпрыемства можа выпусціць токен і атрымаць фінансаванне як з Беларусі, так і з-за мяжы, - адзначыў Дзмітрый Агіевіч. - Верым, што гэта прынясе шмат карысных праектаў у Беларусь. Ёсць ужо шмат заявак на рэгістрацыю на крыптабіржы ад нашых прадпрыемстваў. У асноўным з сферы рэтэйлу, гандлю, а таксама фінансавыя, лізінгавыя арганізацыі. Але гэта магчымасць стане даступнай пасля афіцыйнага рэліза праекта".
Выпуск токенаў, паводле слоў эксперта, гэта ўжо сусветны трэнд. У ЗША значнае развіццё атрымліваюць такенізіраванныя акцыі, іх выпускаюць многія інавацыйныя кампаніі, напрыклад у фарміндустрыі. Залог поспеху тэхналогіі ў тым, што яна выключае пасрэднікаў. "Для таго каб прадаць акцыі, патрэбны ланцужок контрагентаў (банкі, брокеры, трэба мець спецыяльныя рахункі). Калі купляеш токен, маеш адносіны толькі з пляцоўкай, на якой гандлюеш, усё празрыста", - удакладніў ён.
Дзмітрый Агіевіч зрабіў асаблівы акцэнт на тым, што крыптавалютная біржа створана і запушчана менавіта ў Беларусі. "Гэта першая ў свеце біржа такенізіраваных актываў. І мы вельмі ганарымся, што яна створана ў Беларусі. Мы цалкам убудаваліся ў сусветную фінансавую сістэму", - падкрэсліў ён. Больш таго, Беларусь стала лідарам заканадаўчага рэгулявання лічбавай эканомікі. Прыняцце дэкрэта нумар 8 стварыла нарматыўна-прававую базу для развіцця і ўкаранення наватарскіх лічбавых тэхналогій у фінансавай сферы.
"Тэма гэта новая, механіка іншая, яна адрозніваецца ад традыцыйных фінансавых інструментаў. Іншыя краіны спрабуюць рэгуляванне, якое ўжо ёсць, адаптаваць пад крыптасвет. Гэта заўсёды выклікае складанасці, такое рэгуляванне не працуе. Трэба проста сесці і з нуля зрабіць новае прававое поле, як гэта і было зроблена ў Беларусі", - адзначыў Дзмітрый Агіевіч.
Як паведамлялася, кампанія Currency.com у студзені 2019 года запусціла рэгулюемую поўнафункцыянальную гандлёвую платформу для такенізіраваных біржавых актываў. Праект дае магчымасць гандляваць, інвесціраваць у традыцыйныя фінансавыя інструменты з выкарыстаннем крыптавалюты. Currency.com атрымала першую ліцэнзію Парка высокіх тэхналогій (ПВТ) на ажыццяўленне дзейнасці прафесійнага ўдзельніка рынку крыптавалют, выдадзеную ў адпаведнасці з нормамі дэкрэта нумар 8 "Аб развіцці лічбавай эканомікі".
версія для друку
зрабіць стартавай
дабавіць у выбранае