Бізнес-навіны

6 сакавіка, Мінск /Кар. БЕЛТА/. Справаздача супрацоўнікаў Міжнароднага валютнага фонду аб эканамічным развіцці і эканамічнай палітыцы Беларусі будзе разгледжана ў маі на пасяджэнні Савета дырэктараў МВФ. Аб гэтым карэспандэнту БЕЛТА паведаміў сёння кіраўнік місіі МВФ па Беларусі, намеснік начальніка аддзела краін Паўночна-Усходняй Еўропы Еўрапейскага дэпартамента Дэвід Хофман.

Эксперты фонду будуць працаваць у Беларусі да 16 сакавіка. Члены місіі, у прыватнасці, абмяркуюць эканамічную палітыку з кіраўніцтвам краіны, урадам, Нацыянальным банкам, пасля чаго агучаць свае рэкамендацыі.

"Па выніках нашай работы ў рамках гэтай місіі мы будзем рыхтаваць паўнацэнную справаздачу супрацоўнікаў фонду аб эканамічным развіцці і эканамічнай палітыцы Рэспублікі Беларусь. Ён будзе абмяркоўвацца на пасяджэнні Савета выканаўчых дырэктараў Міжнароднага валютнага фонду, якое пройдзе ў маі", - сказаў Дэвід Хофман. Паводле яго слоў, калі ўлады краіны будуць не супраць, справаздача будзе абнародавана.

Як паведамлялася, планавая місія Міжнароднага валютнага фонду прыбыла напярэдадні ў Беларусь. Гэта рэгулярная штогадовая місія, у рамках якой будуць праводзіцца кансультацыі па артыкуле IV. Гэта значыць місія будзе займацца штогадовым аглядам развіцця эканомікі рэспублікі, што праводзяцца і з іншымі краінамі - членамі фонду.

Міжнародны валютны фонд - спецыялізаваная ўстанова ААН са штаб-кватэрай у Вашынгтоне (ЗША). Афіцыйная дата стварэння МВФ - 27 снежня 1945 года. Беларусь з'яўляецца членам МВФ з 1992 года.

Дзейнасць МВФ у Беларусі накіравана на супрацоўніцтва з урадам і Нацыянальным банкам пры падрыхтоўцы праграм эканамічнай палітыкі з акцэнтам на падаткова-бюджэтную і грашова-крэдытную палітыку, абменны курс і гандлёвую палітыку з мэтай дасягнення значнага эканамічнага росту, нізкай інфляцыі і ўстойлівасці плацежнага балансу.