Бізнес-навіны

Сіньцзянскі азіяцка-еўрапейскі гандлёвы цэнтр дапаможа нарасціць экспарт у Кітай праз БУТБ

Фота БУТБ

12 ліпеня, Мінск /Кар. БЕЛТА/. Сіньцзянскі азіяцка-еўрапейскі міжнародны гандлёвы цэнтр дапаможа нарасціць экспарт у Кітай праз БУТБ, паведамілі БЕЛТА ў прэс-службе біржы.

Сіньцзянскі азіяцка-еўрапейскі міжнародны гандлёвы цэнтр (Xinjiang Asia-Europe International Trading Center, АЕЕХ), які з'яўляецца аператарам электроннай гандлёвай пляцоўкі Asia Europe Exchange, акажа садзейнічанне Беларускай універсальнай таварнай біржы ў павелічэнні паставак беларускіх тавараў у Кітай. Пры гэтым размова ідзе не толькі аб інфармацыйнай падтрымцы і дапамозе ў арганізацыі дзелавых мерапрыемстваў на тэрыторыі КНР, але і аб непасрэдным прыцягненні на біржавыя таргі кітайскіх імпарцёраў.

"Цяпер эканоміка Кітая актыўна аднаўляецца пасля пандэміі. У сувязі з гэтым расце попыт на сыравіну, матэрыялы і гатовую прадукцыю, а высокі ўзровень развіцця электроннай камерцыі ў краіне забяспечвае спрыяльныя ўмовы для прымянення біржавых інструментаў. Таму вельмі важна менавіта цяпер кансалідаваць намаганні і прапанаваць кітайскім кампаніям комплекснае рашэнне для работы з Беларуссю, якое ўключае ў сябе электронную платформу для заключэння здзелак, а таксама інфармацыйныя, лагістычныя і фінансавыя сэрвісы. У рамках гэтага праекта мы гатовы падключыць нашых партнёраў з банкаўскай сферы і адну з буйнейшых транспартна-лагістычных кампаній Кітая - "Сінатранс". Галоўнае - як мага раней перайсці ад стадыі планавання да практычнай рэалізацыі дамоўленасцей", - заявіла старшыня савета дырэктараў АЕЕХ спадарыня Чжан Хунпін у час візіту ў цэнтральны офіс БУТБ.

Акрамя таго, на думку спадарыні Чжан, арганізацыя біржавых паставак беларускай прадукцыі ў Паднябесную не запатрабуе значных маркетынгавых затрат, паколькі кітайскі спажывец ужо знаёмы з брэндам "Зроблена ў Беларусі", а ўсе прадстаўленыя на БУТБ ключавыя экспартныя таварныя пазіцыі запатрабаваны на рынку КНР.

"Піламатэрыялы, сухое малако, рапсавы алей, мясныя вырабы - усе гэтыя тавары імпартуюцца ў Кітай з усяго свету і ў тым ліку з Беларусі. Больш таго, за апошнія гады беларуская прадукцыя стала пазнаваемай у КНР, што, на мой погляд, істотна спрашчае задачу па прыцягненні на біржу кітайскіх пакупнікоў. Засяродзіць увагу прапаную на рэгіёнах, праз якія праходзіць Новы шаўковы шлях. У першую чаргу гэта Шанхай, Тайцан і Сіньцзян. У кожным з іх у нас ёсць офісы, таму мы зможам максімальна эфектыўна наладзіць узаемадзеянне з прадстаўнікамі кітайскага бізнесу, зацікаўленымі ў рабоце праз біржу", - упэўнена старшыня савета дырэктараў АЕЕХ.

Па стане на 1 ліпеня на БУТБ былі акрэдытаваны 127 рэзідэнтаў КНР, у тым ліку адзін маючы статус біржавога брокера. Па выніках першага паўгоддзя сума здзелак кітайскіх удзельнікаў павялічылася на 29 працэнтаў да $26 млн.

версія для друку

зрабіць стартавай

дабавіць у выбранае