Бізнес-навіны

13 мая, Мінск /Кар. БЕЛТА/. Чарговае пасяджэнне Савета па чыгуначным транспарце краін СНД пройдзе 20-21 мая ў Мінску, паведамілі БЕЛТА ў прэс-цэнтры Беларускай чыгункі, якая выступае арганізатарам правядзення мерапрыемства.

Парадкам дня прадугледжаны разгляд 12 пытанняў па каардынацыі дзеянняў чыгунак Садружнасці ў частцы міжнародных перавозак пасажыраў і грузаў, сумесным выкарыстанні парку грузавых вагонаў і кантэйнераў, вядзенні ўзаемаразлікаў за перавозкі і аказаныя паслугі, распрацоўцы адзіных нарматыўных дакументаў.

Акрамя таго, будуць прыняты рашэнні па актуалізацыі нарматыўных дакументаў у сферы міжнародных пасажырскіх і грузавых перавозак, тэхнічнага абслугоўвання і рамонту рухомага саставу. Рэгламент работы пасяджэння прадугледжвае час для правядзення двухбаковых сустрэч кіраўнікоў чыгуначных адміністрацый.

"Для Беларускай чыгункі арганізацыя і ўдзел у пасяджэнні савета з'яўляецца важнейшай падзеяй бягучага года ў сферы развіцця міжнароднага супрацоўніцтва", - адзначылі ў прэс-цэнтры.

Савет па чыгуначным транспарце дзяржаў - удзельніц Садружнасці і яго выканаўчы орган (дырэкцыя) былі створаны ў 1992 годзе. Першараднай увагай савет надзяляе забеспячэнне тэхналагічнага адзінства чыгунак. Штогод вядзецца распрацоўка графіка руху і плана фарміравання паяздоў у міжнародных зносінах. Вялікая ўвага ўдзяляецца таксама пытанням тэхнічнага стану грузавых вагонаў. Папярэдняе 61-е пасяджэнне савета прайшло ў кастрычніку 2014 года ў Баку (Азербайджан).