Бізнес-навіны

Самарская вобласць зацікаўлена ў павелічэнні біржавога тавараабароту з Беларуссю

Фота БУТБ

21 чэрвеня, Мінск /Кар. БЕЛТА/. Самарская вобласць Расійскай Федэрацыі зацікаўлена ў развіцці біржавога гандлю з Беларуссю па ўсіх актуальных таварных напрамках. Размова аб гэтым ішла на сустрэчы дэлегацыі расійскага рэгіёна з кіраўніцтвам Беларускай універсальнай таварнай біржы, паведамілі карэспандэнту БЕЛТА ў прэс-службе БУТБ.

Старшыня праўлення БУТБ Аляксандр Асмалоўскі падтрымаў ініцыятыву расійскага боку аб інфармаванні самарскіх прадпрыемстваў аб перавагах БУТБ як альтэрнатыўнага інструмента вядзення бізнесу ў Беларусі, а таксама прапанаваў пры неабходнасці забяспечыць інфармацыйную і тэхнічную падтрымку. "Калі трэба, нашы спецыялісты могуць правесці анлайн-навучанне для зацікаўленых кампаній або ж выехаць у Самарскую вобласць і арганізаваць вочны семінар. Што датычыцца інфармацыі аб актуальных цэнах і асартыменце тавараў, прадстаўленых на біржавых таргах, то гэтыя звесткі можна знайсці на сайце біржы. Напрыклад, каціроўкі, разлічаныя па выніках таргоў, і рэестры заявак на куплю і продаж публікуюцца штодзень і даступны нават для неакрэдытаваных кампаній", - расказаў кіраўнік біржы.

Намеснік старшыні ўрада Самарскай вобласці Расіі Наталля Каціна адзначыла, што істотныя рэзервы росту ёсць у сегменце АПК, таму ўрад рэгіёна гатовы аказаць садзейнічанне ў прыцягненні на беларускую біржавую пляцоўку вядучых сельгасвытворцаў рэгіёна. Такім чынам будуць вырашацца адразу тры важныя задачы: павелічэнне біржавога тавараабароту, дыверсіфікацыя наменклатуры тавараў, уключаных у біржавы гандаль, і пашырэнне кола ўдзельнікаў таргоў з Самарскай вобласці. "Магчымасці гандлёвай пляцоўкі будуць вельмі цікавыя прадпрыемствам аграпрамысловага комплексу Самарскай вобласці. Прычым размова ідзе не толькі аб экспарце сельгаспрадукцыі, скажам, алею, збожжа, мукі, шроту алейных культур, але і аб закупках. У прыватнасці, з прычыны высокага ўзроўню развіцця раслінаводства і жывёлагадоўлі стабільным попытам у нашым рэгіёне карыстаюцца сродкі аховы раслін і ветэрынарныя прэпараты", - адзначыла яна.

Паводле даных БУТБ, цяпер на біржы акрэдытаваны 66 самарскіх кампаній, а ў 2022 годзе Самарская вобласць увайшла ў топ-10 расійскіх рэгіёнаў па суме заключаных біржавых здзелак. У бягучым годзе дадатная тэндэнцыя захоўваецца. Гэтаму ў тым ліку садзейнічае пагадненне аб супрацоўніцтве паміж БУТБ і Гандлёва-прамысловай палатай Самарскай вобласці, якая атрымала статус біржавога брокера-нерэзідэнта. Аснову біржавога тавараабароту Беларусі і Самарскай вобласці складае імпарт металапрадукцыі для патрэб беларускага прамысловага і будаўнічага сектараў. Найбольшым попытам карыстаюцца нержавеючыя трубы, ацынкаваны дрот, падшыпнікі і медныя аноды.

версія для друку

зрабіць стартавай

дабавіць у выбранае