Бізнес-навіны
Прадстаўнікі дзелавых колаў Беларусі і Венгрыі пацвердзілі ўзаемны інтарэс да прадаўжэння бізнес-дыялогу
Фота МЗС Беларусі
4 лістапада, Мінск /Кар. БЕЛТА/. Дэлегацыя беларускіх дзелавых колаў - прадстаўнікоў малога і сярэдняга бізнесу - наведала Венгрыю. Візіт арганізаваны саюзам юрыдычных асоб "Рэспубліканская канфедэрацыя прадпрымальніцтва" ва ўзаемадзеянні з дзелавым клубам "Усходняя Еўропа" з Будапешта пры садзейнічанні пасольства Беларусі ў Венгрыі, паведамілі БЕЛТА ў дыпмісіі.
Беларуская дэлегацыя правяла змястоўную сустрэчу з кіраўніцтвам і членамі дзелавога клуба, у якой таксама прынялі ўдзел прадстаўнікі шэрага венгерскіх кампаній, зацікаўленых у развіцці супрацоўніцтва з партнёрамі з Беларусі. "Бакі абмяняліся актуальнай інфармацыяй аб існуючых бізнес-профілях і перспектыўных напрамках сумеснай работы, правялі кантактную біржу, дасягнулі дамоўленасцей аб узаемадзеянні па лініі дзелавых аб'яднанняў і асобных кампаній", - адзначылі ў беларускай дыпмісіі.
Праграму візіту прадоўжыў семінар аб магчымасцях, умовах і прыкладах дзелавога супрацоўніцтва з замежнымі партнёрамі, які адбыўся ў пасольстве Беларусі ў Будапешце. Удзельнікі семінара атрымалі актуальную інфармацыю не толькі аб венгерскім напрамку, але і па іншых краінах акрэдытацыі дыпмісіі - Босніі і Герцагавіне, Харватыі, у якіх паспяхова дзейнічаюць офісы ганаровых консулаў Беларусі.
Таксама ў ходзе візіту праведзены шэраг В2В-перагавораў, арганізавана наведванне дэлегацыяй прадпрыемства "Беларус Трактар", якое мае шматгадовы вопыт работы ў сферы паставак беларускай трактарнай тэхнікі ў Венгрыю. "Вынікам насычанай дзелавой праграмы стала знаёмства членаў бізнес-дэлегацыі з многімі практычнымі аспектамі работы на замежным рынку, устанаўленне новых дзелавых кантактаў і зацікаўлены абмен ідэямі аб развіцці двухбаковых кааперацыйных сувязей і дзелавой прысутнасці ў розных сектарах эканомікі. Канстатавана захаванне ўзаемнага інтарэсу да прадаўжэння бізнес-дыялогу і супрацоўніцтва, закладзена аснова для далейшага канструктыўнага ўзаемадзеяння і рэалізацыі новых праектаў", - праінфармавалі ў пасольстве.
версія для друку
зрабіць стартавай
дабавіць у выбранае