Бізнес-навіны

Прадпрыемствы Мінпрама за два дні ІНАПРАМа падпісалі 23 дакументы

12 ліпеня, Мінск /Кар. БЕЛТА/. Прадпрыемствы сістэмы Міністэрства прамысловасці Беларусі, паводле аператыўных даных, на палях міжнароднай спецыялізаванай выстаўкі ІНАПРАМ у Екацярынбургу 10-11 ліпеня падпісалі 23 дакументы, у тым ліку 14 пагадненняў, 1 мемарандум, 7 кантрактаў і 1 дагавор. Аб гэтым карэспандэнту БЕЛТА паведамілі ў прэс-службе Мінпрама.

На выстаўцы ІНАПРАМ прадстаўлены 45 прадпрыемстваў Мінпрама. Асобнымі стэндамі, на якіх экспануецца 21 адзінка натуральных узораў тэхнікі, прадстаўлена шэсць прадпрыемстваў (МАЗ, "Белкамунмаш", "АМКАДОР", "Гомсельмаш", МТЗ, БЕЛАЗ).

Аб'яднаны стэнд станкабудаўнічых прадпрыемстваў уключае ў сябе 17 станкабудаўнічых арганізацый, на ім экспануецца 13 натуральных узораў станкоў (частка станкоў прадстаўлена ў рабоце ў "халастым" рэжыме). На аб'яднаным стэндзе прамысловых прадпрыемстваў з экпанаваннем узораў прадукцыі прадстаўлена 21 прадпрыемства Мінпрама ("Магілёўліфтмаш", МЭТЗ імя В.І.Казлова, ММЗ, БМЗ, "Інтэграл", ММЗ імя С.І.Вавілава, БАТЭ і іншыя).

У ходзе візіту ў Екацярынбург міністр прамысловасці Аляксандр Рагожнік прыняў удзел у серыі сустрэч і перагавораў: 9 ліпеня - у сустрэчы прэм'ер-міністра Беларусі Рамана Галоўчанкі з губернатарам Свярдлоўскай вобласці Яўгенам Куйвашавым, 11 ліпеня - у шэрагу сустрэч і перагавораў намесніка прэм'ер-міністра Беларусі Пятра Пархомчыка з намеснікам старшыні ўрада Яраслаўскай вобласці Расійскай Федэрацыі Максімам Аўдзеевым, старшынёй праўлення прамысловага кластара Рэспублікі Татарстан Сяргеем Маёравым, губернатарам Пермскага края Дзмітрыем Махоніным, кіраўніцтвам Расійскага экспартнага цэнтра, міністрам прамысловасці Краснадарскага края Дзмітрыем Хмялько. Бакамі была адзначана дадатная дынаміка ўзаемнага супрацоўніцтва, абазначаны перспектыўныя напрамкі развіцця кааперацыйнага ўзаемадзеяння і існуючы патэнцыял па рэалізацыі сумесных праектаў.

Пытанні рэалізацыі Саюзнай праграмы па фарміраванні адзінай прамысловай палітыкі, у тым ліку па прызнанні тэхналагічных аперацый, якія ажыццяўляюцца на тэрыторыі Саюзнай дзяржавы, а таксама пытанні абароны ўнутранага рынку Беларусі і Расіі былі абмеркаваны на сустрэчы з намеснікам старшыні ўрада - міністрам прамысловасці і гандлю Расійскай Федэрацыі Дзянісам Мантуравым.

Парадак дня на 12 ліпеня таксама ўключае перагаворы з кіраўніцтвам шэрага рэгіёнаў і буйных прамысловых прадпрыемстваў Расіі па стратэгічных напрамках узаемадзеяння.

версія для друку

зрабіць стартавай

дабавіць у выбранае