Бізнес-навіны

Піламатэрыялы на $8,8 млн прададзены ў Кітай на біржавых таргах

Фота з архiва

17 чэрвеня, Мінск /Кар. БЕЛТА/. Больш за 30 тыс. куб.м піламатэрыялаў хвойных парод з пастаўкай у кантэйнерах на ўмовах CFR (кошт і фрахт) на агульную суму $8,8 млн рэалізаваны на рынак КНР па выніках найбуйнейшых за ўвесь час правядзення спецыяльных экспартных таргоў на пляцоўцы Беларускай універсальнай таварнай біржы. Аб гэтым паведаміў карэспандэнту БЕЛТА прэс-сакратар БУТБ Раман Яніў.

"Спецыяльныя гандлёвыя сесіі сталі эфектыўным інструментам па прыцягненні кітайскіх кампаній на біржавую пляцоўку. Цяпер у нас акрэдытаваны 45 рэзідэнтаў КНР. Прычым многія з іх - імпарцёры, якія дзякуючы біржавым таргам заўсёды могуць скамплектаваць партыю піламатэрыялаў патрэбнага аб'ёму. У сваю чаргу для беларускіх экспарцёраў - як дзяржаўных, так і прыватных - гэта магчымасць працаваць непасрэдна з высокамаржынальным кітайскім рынкам. За 5 месяцаў гэтага года на "кітайскіх спецсесіях" рэалізавана пілапрадукцыя на суму $8,4 млн, а з улікам апошняй сесіі - $17,2 млн. Для параўнання: за ўвесь мінулы год агульны экспарт піламатэрыялаў у Кітай па выніках спецыяльных і звычайных гандлёвых сесій склаў $12,8 млн", - расказаў Раман Яніў.

Спецыяльныя гандлёвыя сесіі па рэалізацыі піламатэрыялаў у Кітай праводзяцца на БУТБ са снежня 2020 года пры падтрымцы Міністэрства лясной гаспадаркі Беларусі з мэтай дыверсіфікацыі экспартных паставак айчыннай пілапрадукцыі з традыцыйнага напрамку - краін Еўрапейскага саюза - у іншыя перспектыўныя рэгіёны. Галоўная асаблівасць спецыяльных таргоў заключаецца ў тым, што лоты піламатэрыялаў выстаўляюцца на некалькіх базісах пастаўкі, што дае магчымасць пакупніку выбіраць найбольш зручны пункт прыёмкі тавару. Як правіла, гэта вялікія марскія парты і чыгуначныя станцыі.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з найбуйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае