Бізнес-навіны

Петрышэнка расказаў аб прапановах Беларусі па тарыфах пры транспарціроўцы газу на агульным рынку ЕАЭС

4 студзеня, Мінск /Кар. БЕЛТА/. Беларусь выступае за ўстанаўленне тарыфу пры транспарціроўцы газу на агульным рынку ЕАЭС на ўзроўні, які не перавышае аналагічныя тарыфы для суб'ектаў унутранага рынку газу. Аб гэтым у інтэрв'ю газеце "Рэспубліка" заявіў намеснік прэм'ер-міністра Ігар Петрышэнка, паведамляе БЕЛТА.

Паводле яго слоў, пытанні аднолькавых умоў гаспадарання ў ЕАЭС выступаюць краевугольным каменем стварэння гэтага інтэграцыйнага аб'яднання. Цэнаўтварэнне на паслугі па транспарціроўцы газу на агульным рынку газу ЕАЭС - важнейшае з іх і адзінае ў сферы натуральных манаполій, па якім у бакоў няма поўнага разумення. "Газаздабыўныя краіны прадугледжваюць, што рэгуляванне цэн (тарыфаў) для ўнутраных рынкаў ажыццяўляецца антыманапольнымі органамі краін-удзельніц, а іх фарміраваннне для паставак на экспарт, у тым ліку для ўдзельнікаў агульнага газавага рынку ЕАЭС, аддадзена на водкуп уласнікам газатранспартнай сістэмы. І тут узнікае самае галоўнае пытанне, што аказвае непасрэдны ўплыў на магчымасць пабудовы эфектыўна дзеючага агульнага рынку газу саюза з аднолькавымі ўмовамі для ўсіх яго ўдзельнікаў: ці будуць адрознівацца цэны (тарыфы) на паслугі па транспарціроўцы для паставак на агульны рынак ЕАЭС і для ўнутраных спажыўцоў?" - адзначыў Ігар Петрышэнка.
 
Віцэ-прэм'ер звярнуў увагу, што фарміраванне ўласнікам газатранспартнай сістэмы тарыфу на транспарціроўку прыводзіць да таго, што цана для спажыўцоў Беларусі ў тры разы адрозніваецца ад цаны аналагічнай паслугі для спажыўцоў Смаленскай вобласці Расіі. "Пры такім падыходзе ні пра якія аднолькавыя ўмовы гаспадарання гаварыць не даводзіцца. Мы павінны мець аднолькавае канкурэнтнае асяроддзе для ўсіх суб'ектаў гаспадарання, ці гэта ў Расіі, Беларусі, Казахстане, Арменіі ці Кыргызстане", - падкрэсліў ён.

"Беларускі бок не настойвае на ўвядзенні адзінага для ўсіх дзяржаў-членаў тарыфу на транспарціроўку газу, не спрабуе абавязаць краіны ўвесці дзяржаўнае рэгуляванне гэтых тарыфаў там, дзе яно нацыянальным заканадаўствам не прадугледжана. Наша прапанова заключаецца ў неабходнасці выканання рэгулюючымі органамі і манапалістамі дзяржаў-членаў галоўнага прынцыпу, які забяспечвае сумленную канкурэнцыю ў газавай сферы саюза, - устанаўленне тарыфу пры транспарціроўцы газу на агульным рынку ЕАЭС на ўзроўні, які не перавышае аналагічныя тарыфы для суб'ектаў унутранага рынку газу", - заявіў Ігар Петрышэнка.

Віцэ-прэм'ер нагадаў, што на праведзеным 11 снежня 2020 года пасяджэнні Вышэйшага Еўразійскага эканамічнага савета кіраўнікі дзяржаў даручылі выпрацаваць узгодненыя падыходы ў гэтым пытанні для разгляду на чарговым пасяджэнні.

версія для друку

зрабіць стартавай

дабавіць у выбранае