Бізнес-навіны

Петрышэнка расказаў аб падрыхтоўцы Беларусі да "ЭКСПА-2020"

27 верасня, Мінск /Кар. БЕЛТА/. Намеснік прэм'ер-міністра Ігар Петрышэнка правёў пасяджэнне арганізацыйнага камітэта для падрыхтоўкі нацыянальнай экспазіцыі на сусветнай выстаўцы "ЭКСПА-2020" у Дубаі (ААЭ), перадае карэспандэнт БЕЛТА.

"У нас сёння фінальнае пасяджэнне аргкамітэта па падрыхтоўцы нацыянальнай экспазіцыі на выстаўцы "ЭКСПА-2020" у Дубаі, якая ўжо стартуе на бягучым тыдні. Мы заслухаем інфармацыю ўсіх зацікаўленых аб ступені гатоўнасці да ўдзелу ў выстаўцы нашых кампаній, прадпрыемстваў, арганізацый, міністэрстваў, якія будуць прэзентаваць эканамічны, культурны, сацыяльны, навуковы, адукацыйны і медыцынскі патэнцыял Беларусі", - сказаў Ігар Петрышэнка.

Паводле слоў намесніка прэм'ер-міністра, нацыянальны павільён у тэставым рэжыме плануецца адкрыць 29 верасня. "Праз некалькі дзён пасля ўрачыстай цырымоніі адкрыцця выстаўкі пройдуць дні Віцебскай вобласці (4 кастрычніка), затым Мінска (3 лістапада) і Мінскай вобласці (10 снежня). Будзе прэзентаваны эканамічны патэнцыял двух нашых канцэрнаў "Белдзяржхарчпрам" і "Белнафтахім", - канстатаваў ён. - Таксама мы актыўна рыхтуемся да Нацыянальнага дня Беларусі, які запланаваны на 22 лістапада. У рамках яго правядзення адбудзецца беларускі інвестыцыйны форум, сумесны бізнес-форум з дзелавымі коламі ААЭ, дзе мы павінны падрабязна абмеркаваць і намеціць канкрэтныя шляхі павелічэння ўзаемнага тавараабароту, інвестыцый. У наступным годзе адбудуцца прэзентацыі Брэсцкай, Гродзенскай, Магілёўскай і Гомельскай абласцей".

Віцэ-прэм'ер выказаў упэўненасць, што ўсе зацікаўленыя айчынныя кампаніі падыдуць да мерапрыемства адказна, дастойна прадставяць патэнцыял краіны, заключаць інвестыцыйныя і бізнес-кантракты. "Мы спадзяёмся прыцягнуць у тым ліку інвестараў з ААЭ, а таксама іншых дзяржаў, якія будуць прадстаўлены ў рамках выстаўкі. Мы разлічваем, што прадпрыемствы прадставяць дастойныя інвестыцыйныя праекты і прыцягнуць неабходныя інвестыцыі ў эканоміку нашай краіны", - падкрэсліў ён.

Свой інвестыцыйны патэнцыял на "ЭКСПА-2020" будуць прэзентаваць Кітайска-беларускі індустрыяльны парк "Вялікі камень", свабодная эканамічная зона "Брэміна груп" і іншыя айчынныя кампаніі.

"Спадзяёмся, што такое значнае мерапрыемства, якое было перанесена ў сувязі з пандэміяй, цяпер адбудзецца. Думаю, гэта важны аспект для таго, каб мы і далей прадаўжалі актыўна нарошчваць узаемадзеянне і гандаль з краінамі Персідскага заліва, у прыватнасці ААЭ, а таксама іншымі краінамі, якія будуць прадстаўляць свой патэнцыял у рамках гэтай выстаўкі", - рэзюмаваў Ігар Петрышэнка.

Выстаўка "ЭКСПА" праводзіцца з перыядычнасцю раз у пяць гадоў пачынаючы з 1851 года. Сусветная выстаўка "ЭКСПА-2020" пройдзе ў Дубаі і стане першай у такім фармаце ў рэгіёне Блізкага Усходу, Афрыкі і Паўднёвай Азіі. Выстаўка адкрые свае дзверы для наведвальнікаў 1 кастрычніка 2021 года і завершыцца 31 сакавіка 2022-га. Галоўная канцэпцыя маючага адбыцца мерапрыемства - "Аб'ядноўваючы розумы, ствараем будучыню". Цяпер свой удзел у "ЭКСПА-2020" пацвердзілі 192 краіны свету. Чакаецца, што колькасць наведвальнікаў выстаўкі дасягне 25 млн, прычым каля 70 працэнтаў - з замежных краін.

версія для друку

зрабіць стартавай

дабавіць у выбранае