Бізнес-навіны

Петрышэнка: многія тэхналагічныя распрацоўкі па саюзных праграмах атрымалі міжнароднае прызнанне

1 ліпеня, Мінск /Кар. БЕЛТА/. Сумесныя праграмы Саюзнай дзяржавы ў галіне лічбавай трансфармацыі сёння накіраваны на развіццё перадавых і перспектыўных напрамкаў навукі і тэхнікі. Аб гэтым заявіў намеснік прэм'ер-міністра Беларусі Ігар Петрышэнка на пленарным пасяджэнні VIII Форуму рэгіёнаў Беларусі і Расіі, якое праходзіць у рэжыме відэаканферэнцыі, перадае карэспандэнт БЕЛТА.

Паводле слоў беларускага віцэ-прэм'ера, фарміраванне паўнацэннай адзінай навукова-тэхналагічнай прасторы дружалюбных краін рэалізуецца праз праграмы Саюзнай дзяржавы. "Іх выкананне дае магчымасць павысіць узровень інтэграцыі нашых эканомік, развіць кааперацыю паміж прадпрыемствамі, павысіць канкурэнтаздольнасць сумесна вырабленай прадукцыі", - адзначыў ён.

На пачатковым этапе сумесныя праграмы былі нацэлены на падтрыманне асобных прадпрыемстваў і галін. Цяпер - на стварэнне і развіццё перадавых напрамкаў навукі і тэхнікі.

Перспектыўнымі напрамкамі сумесных навуковых даследаванняў сёння з'яўляюцца інтэлектуальныя сістэмы аналізу інфармацыі (суперкамп'ютары, нейронныя сеткі, штучны інтэлект; касмічнае прыборабудаванне і тэхналогіі); новыя лазерныя матэрыялы; мікраэлектроніка, электратранспарт; шматфункцыянальныя беспілотныя комплексы; ядзерная энергетыка; інфармацыйная бяспека.

"Рэалізавана больш за 60 праграм. Многія распрацоўкі атрымалі міжнароднае прызнанне", - падкрэсліў Ігар Петрышэнка.

У якасці прыкладу ён назваў тэхналогію для вытворчасці кампазіцыйных матэрыялаў, дзякуючы якой укаранёны новыя тэхналагічныя працэсы, створаны новыя віды матэрыялаў; распрацоўку сям'і айчынных суперкамп'ютараў "СКІФ"; серыю праграм" Космас", вынікам якой стала стварэнне сумеснай беларуска-расійскай спадарожнікавай групоўкі па дыстанцыйным зандзіраванні Зямлі.

Таксама ёсць дасягненні ў распрацоўцы беспілотных транспартных сродкаў - з выкарыстаннем праграмы Саюзнай дзяржавы "Аўтаэлектроніка" БЕЛАЗам створаны і апрабаваны беспілотныя кар'ерныя самазвалы.

Рэалізуецца Комплексная праграма развіцця электратранспарту.

Ігар Петрышэнка падкрэсліў, што ў Беларусі поўным ходам ідзе пранікненне ІКТ ва ўсе сферы жыццядзейнасці. Гэта значыць мы непасрэдна назіраем чацвёртую прамысловую рэвалюцыю. І для разгортвання паўнацэннай лічбавай трансфармацыі мы маем усе рэсурсы: нарматыўна-прававую базу, IT-індустрыю ў выглядзе рэзідэнтаў ПВТ, высокатэхналагічны вытворчы сектар, навукова-адукацыйную сферу.

"Разам з тым мы разумеем, што трэба будзе выканаць маштабны комплекс работ. Гэта ўдасканаленне прававой базы, стварэнне адпаведнай інфраструктуры, арганізацыя падрыхтоўкі кадраў, рэалізацыя праектаў дзяржаўна-прыватнага партнёрства ў сферы лічбавай трансфармацыі эканомікі", - дадаў віцэ-прэм'ер.

Форум рэгіёнаў Беларусі і Расіі на працягу васьмі гадоў праходзіць пад эгідай верхніх палат парламентаў дзвюх краін - Савета Рэспублікі Нацыянальнага сходу Беларусі і Савета Федэрацыі Федэральнага сходу Расіі. Чарговы форум праходзіць з 29 чэрвеня па 1 ліпеня. Яго асноўныя мерапрыемствы арганізаваны ў рэжыме відэаканферэнцыі з-за пандэміі COVID-19.

Тэмай стала навукова-тэхнічнае супрацоўніцтва Расіі і Беларусі ў эпоху лічбавізацыі і перыяд фарміравання адзінай навукова-тэхналагічнай прасторы ў працэсе інтэграцыі дзвюх дзяржаў.

Важнай часткай праграмы стала пленарнае пасяджэнне: перад удзельнікамі выступаюць кіраўнікі органаў дзяржаўнай улады, міністэрстваў і ведамстваў, дзелавых колаў дзвюх краін, а таксама эксперты ў сферы лічбавізацыі.

версія для друку

зрабіць стартавай

дабавіць у выбранае