Бізнес-навіны

Пераход да мультытаварнасці: Кітай пачаў купляць на БУТБ беларускае сметанковае масла

Фота з архiва

29 лістапада, Мінск /Кар. БЕЛТА/. Першыя 23 т вырабленага ў Беларусі сметанковага масла рэалізаваны ў Кітай праз Беларускую ўніверсальную таварную біржу - пакупніком выступіў кітайскі імпарцёр малочнай прадукцыі з галаўным офісам у Цындаа (правінцыя Шаньдун), паведамілі БЕЛТА ў прэс-службе БУТБ.

Раней гэта кампанія ўжо набывала на таргах БУТБ сухое малако і сухую малочную сыроватку і з улікам паспяховага вопыту выкарыстання беларускай біржавой пляцоўкі прыняла рашэнне пашырыць наменклатуру тавараў, якія закупляюцца.

"У гэтым годзе ключавой тэндэнцыяй у біржавым гандлі Беларусі і Кітая з'яўляецца ярка выяўлены пераход да мультытаварнасці, - звярнулі ўвагу ў прэс-службе таварнай біржы. - Так, калі яшчэ год таму практычна ўвесь аб'ём біржавога тавараабароту з КНР забяспечваў экспарт беларускіх піламатэрыялаў, то цяпер структура здзелак стала больш дыверсіфікаванай. У прыватнасці, паступова расце ўдзельная вага сельгаспрадукцыі - галоўным чынам за кошт рэалізацыі ў Паднябесную айчынных малакапрадуктаў".

У сваю чаргу кітайскія вытворцы пачалі актыўней пастаўляць у Беларусь не толькі чорны металапракат, але і розныя камплектуючыя і запасныя часткі для прамысловага абсталявання і электратэхнікі. Усё гэта сведчыць, як заўважылі на БУТБ, аб павышэнні інтарэсу кітайскага бізесу да біржавога рынку Беларусі, што станоўча ўплывае на дынаміку ўзаемнага гандлю. Як доказ, па выніках 10 месяцаў сума біржавых здзелак паміж кітайскімі і беларускімі кампаніямі вырасла ў два разы.

Паводле даных БУТБ, цяпер доля кітайскага рынку ў агульным аб'ёме біржавога экспарту складае 11 працэнтаў, што ставіць КНР на другое месца па гэтым паказчыку. Першае месца займае Расія з удзельнай вагой 61 працэнт, а трэцяе - Азербайджан з доляй 8 працэнтаў.

версія для друку

зрабіць стартавай

дабавіць у выбранае