Бізнес-навіны

Пастаўкі тэхнікі і развіццё інфраструктуры АЭС - Беларусь хоча паглыбіць супрацоўніцтва з Бангладэш

У час перагавораў. Фота пасольства Беларусі ў Індыі

23 сакавіка, Мінск /Кар. БЕЛТА/. Дэлегацыя беларускіх прамысловых прадпрыемстваў наведала з візітам Бангладэш, паведамілі БЕЛТА ў пасольстве Беларусі ў Індыі.

У склад дэлегацыі ўвайшлі прадстаўнікі "Амкадора", Мінскага аўтамабільнага завода, "Белкамунмаша" і кампаніі "Прамагралізінг". Узначаліў дэлегацыю намеснік міністра прамысловасці Дзмітрый Харытончык.

У Бангладэш беларуская дэлегацыя правяла перагаворы з міністрам мясцовага самакіравання, сельскага развіцця і кааператываў Таджулам Ісламам, ведамства якога ў 2017 годзе стала асноўным пакупніком тэхнікі "Амкадор". "Яна мае намер набыць дадатковую дарожна-будаўнічую тэхніку на $17 млн. Бакі абмеркавалі пытанні абслугоўвання абсталявання па першым кантракце і ўзгаднілі прапановы па канкрэтных найменнях па другім кантракце", - расказалі ў дыпмісіі.

Пасажырскім электратранспартам зацікавілася кіраўніцтва сталіцы Бангладэш. Пасля вывучэння патрэбнасці Дакі ў электробусах (шырыня праезнай часткі, канкрэтны маршрут, вышынныя перапады мясцовасці, загрузка пасажырамі, сярэдняя скорасць руху і іншыя істотныя параметры) бангладэшскі бок мае намер звярнуцца да беларускіх прадпрыемстваў па камерцыйныя прапановы па тэхніцы і адпаведнай інфраструктуры. Пры неабходнасці будзе арганізаваны візіт у Мінск кіраўніцтва або спецыялістаў Міністэрства мясцовага самакіравання, сельскага развіцця і кааператываў, а таксама мэрыі паўночнай Дакі для больш дэталёвага азнаямлення з прадукцыяй прадпрыемстваў.

Беларуская дэлегацыя таксама сустрэлася з міністрам гандлю Бангладэш Ціпу Муншы. З ім абмяркоўваліся пытанні нарошчвання тавараабароту паміж краінамі. Бангладэш у 2020 годзе паставіў у Беларусь тавараў на $26,1 млн, у той час беларускі экспарт перавысіў $115 млн. Бакі разгледзелі пытанні спрашчэння доступу бангладэшскіх прадметаў адзення, джутавай тканіны, вырабаў са скуры, лекавых сродкаў на беларускі рынак.

Як паведамілі ў пасольстве, у час сустрэчы Дзмітрый Харытончык заявіў, што Беларусь зацікаўлена аказаць садзейнічанне ў інфраструктурным будаўніцтве, звязаным з ядзернымі аб'ектамі, у пастаўках экалагічна чыстага транспарту, сельскагаспадарчага абсталявання і тэхналогій перапрацоўкі і захоўвання вырабленай сельскагаспадарчай прадукцыі і прадукцыі жывёлагадоўлі, развіцці племянной жывёлагадоўлі.

Асобна бакі закранулі тэматыку ўзаемадзеяння з Бангладэш у кантэксце эканамічнай інтэграцыі на еўразійскай прасторы, уключаючы заключэнне дагавора аб зоне свабоднага гандлю з ЕАЭС і ўзгадненне гандлёвых квот.

Абмеркаванне супрацоўніцтва ў сферы ядзерных тэхналогій прадоўжылася на сустрэчы з галоўным выканаўчым дырэктарам будуемай атамнай станцыі ў Рупуры Алакам Чакрабарці. Прымаючы пад увагу той факт, што тыпы АЭС у Астраўцы і ў Рупуры практычна ідэнтычныя, кіраўніцтва атамнага аб'екта выказала крайнюю зацікаўленасць у выкарыстанні беларускага вопыту ў развіцці інфраструктуры як гэтага аб'екта, так і двух запланаваных да будаўніцтва ў будучым, рашэнне аб пачатку запуску якіх павінна быць прынята да канца бягучага года.

"Размова ішла аб абмене вопытам і/або садзейнічанні ў будаўніцтве спадарожных атамнай станцыі аб'ектаў, такіх як дарогі, адміністрацыйныя будынкі, жылыя і сацыяльныя аб'екты, пастаўках бяспечнага абсталявання, высокакваліфікаванага навучання персаналу. Асаблівае значэнне нададзена мэтазгоднасці падпісання рамачнага пагаднення аб супрацоўніцтве ў сферы атамнай энергетыкі паміж абодвума бакамі для эфектыўнага ўзаемадзеяння", - адзначылі ў пасольстве.

Яшчэ адной важнай тэмай абмеркавання сталі пытанні ўдзелу беларускіх спецыялістаў у стварэнні пажарных каманд (знешняга радыуса) для абароны ядзернага аб'екта ў Рупуры. Бангладэшскі бок зацікаўлены ў комплексным вырашэнні гэтага пытання - пастаўках тэхнікі, будаўніцтве інфраструктуры і навучанні спецыялістаў.

Па запрашэнні мэра Газіпура Джахангіра Алама беларуская дэлегацыя таксама наведала мэрыю і азнаёмілася з некаторымі будуемымі ўжо дзеючымі аб'ектамі. Тут ужо добра ведаюць беларускую дарожна-будаўнічую тэхніку і тэхніку агульнага профілю, таму гатовы разглядаць пытанне закупкі такога віду абсталявання. Зацікаўлены таксама ў набыцці самазвалаў МАЗ на суму $50-100 млн. Мэрыя выказала інтарэс і да беларускіх электробусаў.

версія для друку

зрабіць стартавай

дабавіць у выбранае