Бізнес-навіны

Пасол: гандлёвыя адносіны паміж Іранам і Беларуссю будуць умацоўвацца

Фота з архiва

14 лютага, Мінск /Кар. БЕЛТА/. Гандлёвыя адносіны паміж Іранам і Беларуссю будуць умацоўвацца. Аб гэтым заявіў Надзвычайны і Паўнамоцны пасол Ірана ў Беларусі Саід Яры ў эфіры тэлеканала СТБ, паведамляе БЕЛТА.

"Дыпламатычныя адносіны паміж Іранам і Беларуссю былі ўстаноўлены 29 гадоў таму. З самага пачатку яны грунтаваліся на прынцыпах узаемнай павагі і ўпэўненасці адзін у адным. Цяпер паміж кіраўнікамі нашых краін устаноўлены вельмі добрыя адносіны", - сказаў Саід Яры.

Паводле яго слоў, у бліжэйшым будучым, з улікам наладжвання адносін з Еўразійскім эканамічным саюзам, гандлёвыя адносіны паміж Іранам і Беларуссю будуць умацоўвацца. "Я лічу, што паміж нашымі краінамі ёсць вельмі вялікі патэнцыял, які не выкарыстоўваецца належным чынам, - акцэнтаваў ён увагу. - Нашы прэзідэнты падкрэслілі важнасць і неабходнасць распрацоўкі дарожнай карты супрацоўніцтва, гэтым займаюцца міністэрствы замежных спраў дзвюх краін. Асабліва вялікі патэнцыял ёсць у сферы энергетыкі, эканомікі, навукі і тэхналогій. Яшчэ адна сфера, якой трэба ўдзяліць больш увагі, - гэта турызм і ў цэлым устанаўленню адносін паміж народамі дзвюх краін. На пасяджэнні сумеснай консульскай камісіі, якая адбылася 1 снежня 2021 года, была дасягнута дамоўленасць аб спрашчэнні візавага рэжыму для турыстычных груп. Адзін з вельмі важных крокаў ва ўмацаванні двухбаковага супрацоўніцтва - гэта арганізацыя прамога авіярэйсу паміж сталіцамі нашых краін. Для гэтага мы прыклалі вельмі шмат намаганняў. Я спадзяюся, у бліжэйшым будучым гэты прамы рэйс будзе арганізаваны".

На думку пасла, у Беларусі барацьба з распаўсюджваннем каранавіруса арганізавана дастаткова добра - як на ўзроўні саміх людзей, так і на ўзроўні дзяржавы. "Я бачыў, што людзі добра выконваюць усе неабходныя пратаколы, план усеагульнай вакцынацыі выконваецца дзяржавай з сур'ёзным падыходам. У цэлым, я ацаніў бы беларускі шлях барацьбы з пандэміяй як паспяховы", - падкрэсліў Саід Яры.

Што датычыцца санкцыйнага націску на Беларусь, ён адзначыў: "Мы асуджаем прымяненне санкцый і лічым такую палітыку першапачаткова асуджанай на правал. Незалежнасць патрабуе пэўных расходаў. Любая краіна, якая хоча быць незалежнай, на яе адразу накладваюць санкцыі. У адносінах да Беларусі адбылося тое ж самае - незалежная палітыка беларускай дзяржавы прывяла да таго, што амерыканцы ўвялі супраць вашай краіны санкцыі. Я ўпэўнены, што беларускі народ дастойна пройдзе праз гэты складаны перыяд, - канстатаваў дыпламат. - Свет шматпалярны, ён не абмежаваны Злучанымі Штатамі і заходнімі краінамі. Цяпер фарміруюцца новыя цэнтры, новыя полюсы ў сферы эканомікі, у ваеннай сферы. Беларусь можа развіваць адносіны з краінамі Азіі, Блізкага Усходу, з Расіяй, Кітаем і такім чынам справіцца з санкцыямі".

версія для друку

зрабіць стартавай

дабавіць у выбранае