Бізнес-навіны

Пакістан зацікавіўся вопытам Беларусі ў перапрацоўцы вуглевадародаў

25 лістапада, Ісламабад /Кар. БЕЛТА/. Пакістан зацікаўлены ў супрацоўніцтве з Беларуссю ў сферы вуглевадароднай прамысловасці. Аб гэтым паведаміў журналістам міністр гандлю Пакістана, сустаршыня беларуска-пакістанскай міжурадавай камісіі па гандлёва-эканамічным супрацоўніцтве Джам Камал Хан на палях беларуска-пакістанскага бізнес-форуму ў Ісламабадзе, перадае карэспандэнт БЕЛТА.

"У Пакістана таксама вялікі патэнцыял у вуглевадароднай прамысловасці. Некаторыя нашы кампаніі працуюць тут ужо 70 гадоў. А Беларусь мае значны тэхналагічны вопыт у выкарыстанні і перапрацоўцы вуглевадародаў. Мы хацелі б вывучыць гэтыя напрацоўкі для патрэб Пакістана. На бягучы момант гэтыя сферы ўяўляюць узаемны інтарэс для дзвюх краін", - сказаў Джам Камал Хан.

Ён адзначыў, што бакі ўжо даўно наладзілі цеснае ўзаемадзеянне ў машынабудаванні і сельскай гаспадарцы. Так, трактар "Беларус" карыстаецца ў Пакістане вельмі вялікай папулярнасцю яшчэ з савецкіх часоў.

"У той жа час мы стараемся даследаваць іншыя таварныя групы, асабліва ў плане скураных вырабаў, фармацэўтыкі. Ёсць вялікі патэнцыял з пункту гледжання росту ў сельскай гаспадарцы, павелічэння вытворчасці прадуктаў харчавання. У Беларусі нам цікава вытворчая тэхніка, - сказаў міністр. - Таму, я думаю, ёсць шмат магчымасцей для росту. Мы хацелі б зразумець, што перашкаджае развіццю нашых адносін, і зняць гэтыя бар'еры".

версія для друку

зрабіць стартавай

дабавіць у выбранае