Бізнес-навіны

Інвестыцыі БЕЛАЗа ў стварэнне сучаснага комплексу кольцараскачвання складуць амаль Br200 млн

Фота з архiва

18 снежня, Мінск /Кар. БЕЛТА/. Інвестыцыі БЕЛАЗа ў стварэнне кольцараскатнай вытворчасці з рэканструкцыяй блока вытворчых цэхаў складуць Br194,8 млн, паведамілі БЕЛТА ў прэс-службе завода.

БЕЛАЗ стварае на сваёй холдынгавай пляцоўцы ў Оршы высокатэхналагічную вытворчасць для выпуску кар'ерных самазвалаў вялікай грузападымальнасці і асваення новых відаў прадукцыі. "Гэта якраз прыклад арганізацыі цалкам новай для нас вытворчасці з вялікім аб'ёмам будаўніча-мантажных работ і інжынірынгу", - сказаў намеснік генеральнага дырэктара - тэхнічны дырэктар прадпрыемстваў Сяргей Лесін.

Укараняемая тэхналогія раскачвання дасць магчымасць атрымліваць высакаякасныя загатоўкі суцэльнакатаных і профільных кольцаў са сталі розных марак з вонкавым дыяметрам да 3 м і масай да 3 т з высокай якасцю і мінімальным прыпускам пад далейшую апрацоўку. З іх будуць вырабляцца падшыпнікі, каронныя шасцерні планетарных перадач, фланцы і іншыя віды прадукцыі. Цяпер у Беларусі такія загатоўкі не вырабляюцца. Між тым яны запатрабаваны не толькі на ўнутраным, але і на расійскім рынку. "Такая высокатэхналагічная прадукцыя выкарыстоўваецца ў машынабудаванні, авіярухавікабудаванні, атамнай энергетыцы, суднабудаванні і іншых галінах прамысловасці. Таму рэалізацыя гэтага амбіцыйнага інвестпраекта з высокім экспартным патэнцыялам прывядзе не толькі да стварэння ўласнай высокатэхналагічнай вытворчасці раскатных кольцаў, але і забяспечыць іх поўнае імпартазамяшчэнне як для патрэб БЕЛАЗа, так і для іншых прадпрыемстваў Беларусі і Расіі", - адзначылі ў прэс-службе.

У час рэалізацыі праекта, які стартаваў у 2021 годзе, заключаны кантракты на пастаўку тэхналогіі і абсталявання аўтаматызаванай лініі для вырабу кальцавых загатовак і ўчастка іх тэрмічнай апрацоўкі. Узведзены вытворчы і адміністрацыйна-бытавы карпусы, вядзецца ўнутраная аддзелка, падвод інжынерных сетак і ўладкаванне фундаментаў пад абсталяванне. "Закантрактаванае абсталяванне цяпер выраблена, вядзецца яго папярэдняя прыёмка прадстаўнікамі нашага прадпрыемства. Далей чакаем транспарціроўку абсталявання ў Оршу, мантаж, падключэнне, пусканаладачныя работы, набор і навучанне персаналу для прамысловай вытворчасці кальцавых загатовак. Асноўныя работы па гэтым комплексе плануем завяршыць у 2024 годзе", - падкрэсліў Сяргей Лесін.

На гэтым этапе пад задачы інвестпраекта асвоена Br44,7 млн з агульнай сумы прыцягнутых сродкаў.

версія для друку

зрабіць стартавай

дабавіць у выбранае