Бізнес-навіны

Новы рэзідэнт "Вялікага каменя" пачынае праект у сферы кітайскай медыцыны

Фота з архiва

18 сакавіка, Мінск /Кар. БЕЛТА/. У Кітайска-беларускім індустрыяльным парку "Вялікі камень" зарэгістраваны новы рэзідэнт "Новаэра Біятэх" з праектам у сферы традыцыйнай кітайскай медыцыны, перадае карэспандэнт БЕЛТА.

Кампанія створана пры ўдзеле Інстытута культуры і эканомікі Цзіньтай, ТАА "Клініка кітайскай медыцыны Сішаньцынсюе (Пекін)" і ТАА "Кампанія фармацэўтычных тэхналогій Сішаньцынсюе (Пекін)".

На першым этапе плануецца арганізацыя вытворчасці медыцынскіх прэпаратаў для лячэння каранавіруса, якія пасля будуць экспартавацца ва Украіну, Расію, Азербайджан, Турцыю, Індыю і іншыя краіны. Чакаецца, што выпуск лекавых сродкаў пачнецца ў 2021 годзе.

Акрамя таго, будзе створаны Еўразійскі цэнтр традыцыйнай кітайскай медыцыны для культурнага абмену, дыягностыкі і лячэння. Ён будзе прадастаўляць медыцынскія паслугі рэзідэнтам "Вялікага каменя", кітайскім і замежным супрацоўнікам парка. Цэнтр будзе развіваць узаемадзеянне з навукова-даследчымі ўстановамі, установамі аховы здароўя Беларусі і суседніх краін для абмену вопытам у сферы традыцыйнай кітайскай медыцыны.

"Наш новы рэзідэнт будзе рэалізоўваць інвестыцыйны праект, звязаны з кітайскай традыцыйнай медыцынай. Лекавыя сродкі, дабаўкі, якія плануецца выпускаць, заснаваны на экалагічна чыстым прыродным матэрыяле. Яны будуць запатрабаваны не толькі для дапамогі ў лячэнні каранавіруса, але таксама і пры лячэнні прастудных захворванняў, грыпу, астмы. Напрамкі, якія ставяць у аснову менавіта здароўе чалавека, на сёння вельмі актуальныя ў многіх краінах свету, асабліва цяпер, у перыяд каранавіруснай інфекцыі", - сказаў кіраўнік адміністрацыі Кітайска-беларускага індустрыяльнага парка "Вялікі камень" Аляксандр Ярашэнка.

Паводле яго слоў, перспектыва рэалізацыі такіх прадуктаў перш за ўсё накіравана на экспартны складнік. "Еўразійская эканамічная прастора, перш за ўсё Расія, таксама Украіна, Азербайджан, Турцыя, нават Індыя гучаць у планах нашых партнёраў. Думаю, і ў нашай краіне гэты прадукт будзе таксама запатрабаваны", - адзначыў ён.

У далейшым у планах кампаніі задзейнічаць і лячэбны прыродны рэсурс Беларусі. "У будучым плануецца выкарыстоўваць менавіта экалагічна чыстыя, травяныя складнікі, вырашчаныя ў Беларусі", - дадаў кіраўнік індустрыяльнага парка.

"Прыход новага рэзідэнта - гэта ўжо вялікае дасягненне, паколькі гэта ўклад у нашу эканоміку. Да нас прыходзіць традыцыйная кітайская медыцына, якую мы даволі нядрэнна ведаем. Медыцына, якая заснавана на традыцыях, на расліннай сыравіне, намі толькі вітаецца. Вядома, будзе праведзены комплекс рэгістрацыйных мерапрыемстваў, валідацыі і г.д., але паколькі Кітай вядомы сваімі традыцыйнымі якаснымі медыцынскімі прэпаратамі, вырабамі, біялагічна актыўнымі дабаўкамі, я думаю, што гэта не будзе складана. Вядома, мы будзем усяляк садзейнічаць паскарэнню гэтых працэсаў", - канстатаваў намеснік міністра аховы здароўя Барыс Андрасюк.

Надзвычайны і Паўнамоцны Пасол КНР у Беларусі Се Сяаюн адзначыў, што спатрэбілася ўсяго крыху больш за месяц, каб завяршыць пераход ад намеру супрацоўніцтва да афіцыйнага пагаднення. "Уваходжанне праекта Інстытута культуры і эканомікі Цзіньтай у галіне традыцыйнай кітайскай медыцыны ў Кітайска-беларускі індустрыяльны парк мае вялікае значэнне. Гэта не толькі прыўнясе кітайскую медыцыну ў праект, але і стане прарывам у дзелавым супрацоўніцтве паміж Кітаем і Беларуссю ў сферы аховы здароўя, таксама будзе садзейнічаць супрацоўніцтву ў частцы сельскай гаспадаркі і знешняга гандлю", - падкрэсліў ён.

"Сёння мы назіраем знакавую падзею. У парку стартуе новы напрамак у фарміраванні фармацэўтычнага кластара і развіцці кітайскай традыцыйнай медыцыны. Гэта не проста сістэма лячэння. Гэта і культура, і вучэнне, і гісторыя, і мудрасць кітайскага народа. У барацьбе з новым тыпам каранавіруса традыцыйная кітайская медыцына зарэкамендавала сябе эфектыўна ў частцы дапаможнай тэрапіі і прафілактыкі", - адзначыў Надзвычайны і Паўнамоцны Пасол Беларусі ў КНР Юрый Сянько.

Паводле яго слоў, традыцыйная кітайская медыцына сёння - гэта сінэргія вялікага вопыту і інавацый, што прыкоўвае ўвагу ўсё большай колькасці краін і людзей. "Упэўнены, што і эфект ад рэалізацыі праекта будзе адпаведны. Перспектывы абумоўлены выгаднымі ўмовамі парка "Вялікі камень" з пункту гледжання прававога рэжыму асаблівай эканамічнай зоны, унікальных прэферэнцый, лагістыкі, а таксама ёмістым рынкам ЕАЭС, членам якога з'яўляецца Беларусь, і непасрэднай блізкасцю да найбуйнейшага рынку краін ЕС", - дадаў пасол.

"Мы спадзяёмся, што зможам стварыць добры эфект для гандлёва-эканамічных адносін дзвюх краін і ўнесці новую мадэль у супрацоўніцтва з Беларуссю, - падкрэсліў кіраўнік кампаніі "Новаэра Біятэх" Цай Чуаньцын.

Ён выказаў надзею, што арганізацыі Міністэрства аховы здароўя змогуць як мага хутчэй дапамагчы кампаніі легалізаваць кітайскія лекавыя сродкі ў Беларусі і спрасціць працэдуры праходжання рэгістрацыі. "Гэта стане новым зыходным пунктам для развіцця фітамедыцыны як у Беларусі, так і ў іншых краінах СНД", - сказаў Цай Чуаньцын.

Акрамя таго, больш за 400 відаў лекавых раслін Беларусі кампанія збіраецца паглыблена даследаваць і экспартаваць іх у Кітай. "Фітамедыцына ў вас мае вельмі глыбокія карані. Мы хочам, каб яна дапамагала захоўваць здароўе грамадзян абедзвюх краін, - сказаў кіраўнік "Новаэра Біятэх". - Мы хочам пачаць нашу работу ў парку як мага хутчэй. У нас ёсць шмат заказаў".

У гэты ж дзень таксама адбылося падпісанне мемарандума паміж Міністэрствам эканомікі Беларусі, Інстытутам культуры і эканомікі Цзіньтай і ААТ "Кітайская карпарацыя інжынірынгу САМС".

Дырэктару Інстытута культуры і эканомікі Цзіньтай Цай Чуаньцыну і генеральнаму дырэктару ТАА "Кітайская карпарацыя інжынірынгу САМС" Ван Юйхану былі ўручаны знакі адрознення "Вялікага каменя".

Кітайска-беларускі індустрыяльны парк "Вялікі камень" - асаблівая эканамічная зона са спецыяльным прававым рэжымам, размешчаная за 25 км ад Мінска. У "Вялікім камені" зарэгістравана 69 рэзідэнтаў з 14 краін. Прыярытэтныя для парка напрамкі - машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб'ёмаў даных.

версія для друку

зрабіць стартавай

дабавіць у выбранае