Бізнес-навіны

Нікарагуа, Зімбабвэ, Экватарыяльная Гвінея. Кіраўнік "АМКАДОРа" расказаў аб планах па пастаўцы тэхнікі

11 красавіка, Мінскі раён /Кар. БЕЛТА/. Генеральны дырэктар ААТ "АМКАДОР" - кіруючая кампанія холдынга" Андрэй Яроцкі расказаў журналістам аб планах па пастаўцы тэхнікі на семінары-нарадзе прадпрыемстваў меліярацыйных сістэм Беларусі, перадае карэспандэнт БЕЛТА.

"Мы цяпер адпрацоўваем пастаўку тэхнікі ў Нікарагуа. Там цяпер знаходзіцца намеснік кіраўніка Адміністрацыі Прэзідэнта. І ў нас адпрацаваны кантракт на пастаўку 260 адзінак дарожна-будаўнічай тэхнікі ў гэту краіну. І вось якраз па выніках візіту павінна быць ужо дасягнута канкрэтная дамоўленасць па рэалізацыі гэтага кантракта", - сказаў Андрэй Яроцкі.

Паводле яго слоў, прапрацоўваюцца і пастаўкі больш як 80 адзінак тэхнікі ў Зімбабвэ. "Таксама Экватарыяльная Гвінея зацікаўлена ў нашых машынах лесапрамысловага комплексу. Ідзе адпрацоўка кантрактаў, і мы спадзяёмся, што ў гэтым годзе першыя пастаўкі машын у Экватарыяльную Гвінею, Зімбабвэ і Нікарагуа адбудуцца", - адзначыў гендырэктар.

10 красавіка прайшоў семінар-нарада прадпрыемстваў меліярацыйных сістэм Беларусі з дэманстрацыяй магчымасцей тэхнікі холдынга "АМКАДОР". У час мерапрыемства была прадэманстравана работа меліярацыйных машын "АМКАДОР" у рэальных умовах эксплуатацыі: бульдозер гусенічны AMKODOR DC201LGP, траншэекапальнік AMKODOR XT15CD1, гусенічныя экскаватары AMKODOR XC231LC і AMKODOR XC250LC, трактар АМКАДОР 5300 з універсальным самазвальным паўпрычэпам AMKODOR US303D, а таксама ўніверсальныя пагрузчыкі і іншыя спецыяльныя машыны. На выставачнай пляцоўцы былі прадстаўлены больш за 20 мадэлей спецыяльных машын "АМКАДОР", уключаючы навінкі, якія сышлі з канвеера ў студзені - сакавіку 2024 года.

Холдынг "АМКАДОР" - адзін з вядучых вытворцаў самага шырокага мадэльнага рада сучаснай высокапрадукцыйнай спецыяльнай тэхнікі для ўсіх галін эканомікі. Толькі за 2023 год створана 11 новых мадэлей спецыяльных і сельскагаспадарчых машын. Асвоена вытворчасць мастоў, маніпулятараў, харвестарных галовак, сістэм кіравання і іншых камплектуючых для дасягнення максімальнай уласнай лакалізацыі машын. "АМКАДОР" - адзіны ў Беларусі вытворца меліярацыйных машын і аднакаўшовых гідраўлічных экскаватараў на гусенічным і колавым ходзе.-0-

версія для друку

зрабіць стартавай

дабавіць у выбранае