Бізнес-навіны

22 сакавіка, Мінск /Кар. БЕЛТА/. Індыя лічыць перспектыўным супрацоўніцтва з Беларуссю ў стварэнні медабсталявання, заявіў Надзвычайны і Паўнамоцны Пасол Індыі ў Беларусі Панкадж Саксена ў ходзе адкрыцця Беларускага медыцынскага форуму (BelarusMedica) у Мінску, перадае карэспандэнт БЕЛТА.

Панкадж Саксена адзначыў, што ёсць некалькі сфер, дзе Беларусь і Індыя могуць узмацніць узаемадзеянне. У прыватнасці, гэта стварэнне медыцынскага і дыягнастычнага абсталявання і развіццё медтурызму.

"Гэта выстаўка ўяўляе сабой платформу, якая дае магчымасць двум бакам сустракацца адзін з адным і наладжваць супрацоўніцтва, што будзе карысным для абедзвюх краін", - сказаў пасол. Ён дадаў, што ўдзел індыйскіх кампаній у экспазіцыі - выдатная магчымасць наладзіць узаемаадносіны для далейшага стварэння сумесных прадпрыемстваў як у Індыі, так і ў Беларусі.

Індыя з'яўляецца пачэсным госцем выстаўкі "Ахова здароўя Беларусі" (BelarusMedica). Свае напрацоўкі ў галіне аховы здароўя прадстаўляюць 48 індыйскіх кампаній.

Выстаўка найноўшых дасягненняў у галіне медыцыны праходзіць у Мінску з 22 па 25 сакавіка па адрасе: вул. Пераможцаў, 20/2, Футбольны манеж.