Бізнес-навіны

Нацыянальны павільён Беларусі адкрыўся на кітайскай гандлёва-інвестыцыйнай выстаўцы ў Ланьчжоу

8 ліпеня, Мінск /Кар. БЕЛТА/. Нацыянальны павільён Беларусі адкрыўся на 30-й Міжнароднай кітайскай гандлёва-інвестыцыйнай выстаўцы ў Ланьчжоу. Аб гэтым БЕЛТА паведамілі ў Генконсульстве Беларусі ў Чунцыне.

У цырымоніі адкрыцця юбілейнай выстаўкі прыняла ўдзел дэлегацыя Гродзенскай вобласці на чале са старшынёй Гродзенскага абласнога выканаўчага камітэта Уладзімірам Каранікам.

"Мы гатовы прыкласці ўсе намаганні для паглыблення развіцця беларуска-кітайскіх адносін, давернага ўсебаковага стратэгічнага партнёрства і ўзаемавыгаднага супрацоўніцтва на карысць нашых рэгіёнаў", - заявіў кіраўнік беларускага рэгіёна.

Нацыянальны павільён Беларусі ў бягучым годзе прадставілі 13 вядучых прадпрыемстваў Гродзенскай вобласці ў розных сферах: мяса-малочнай, шкляной, хімічнай прамысловасці, дрэваапрацоўкі, лагістыкі і турызму.

"На палях выстаўкі адбылася кантактна-кааперацыйная біржа з удзелам амаль 30 прадпрыемстваў правінцыі Ганьсу. Прадстаўнікі з абодвух бакоў прадметна абмеркавалі супрацоўніцтва і намецілі контуры далейшага ўзаемадзеяння", - расказалі ў Генконсульстве.

Патэнцыял Гродзенскай вобласці таксама быў прэзентаваны на Форуме эканамічнага супрацоўніцтва рэгіёнаў-пабрацімаў. Там адбылася цырымонія падпісання пагадненняў аб супрацоўніцтве паміж Замкавым комплексом "Мір" і музеем правінцыі Ганьсу, паміж РУП "Белмытнясэрвіс" і цэнтрам лагістычных паслуг "У Вэй".

Беларуская дэлегацыя правяла перагаворы з кіраўніцтвам кампаніі "СІГІКОП" - галаўной кампаніяй правінцыі Ганьсу па міжнародным тэхніка-эканамічным супрацоўніцтве.

версія для друку

зрабіць стартавай

дабавіць у выбранае