Бізнес-навіны

"Нацыянальны банк прыняў Стратэгію інстытуцыянальнага развіцця на 2017-2020 гады, якая ўпершыню вызначае місію, бачанне і сярэднетэрміновую мэту інстытуцыянальнага развіцця Нацбанка. У дакуменце таксама сфармуляваны задачы, стратэгічныя ініцыятывы, шляхі і спосабы дасягнення мэты інстытуцыянальнага развіцця", - растлумачылі ва ўпраўленні. Стратэгія зацверджана пастановай праўлення Нацыянальнага банка нумар 623 ад 19 снежня.

У Нацбанку растлумачылі, што прыняцце стратэгіі абумоўлена ўдасканаленнем мадэлі стратэгічнага планавання дзейнасці банка ва ўмовах узмацнення валацільнасці знешніх сыравінных, фінансавых і таварных рынкаў, імклівага развіцця інфармацыйных тэхналогій. Дакумент з'яўляецца вынікам аналізу перадавога міжнароднага вопыту стратэгічнага планавання дзейнасці цэнтральных банкаў, а таксама вынікам абагульнення ўласнага вопыту і ўнутраных дыскусій адносна бачання будучыні Нацыянальнага банка.

"На бліжэйшыя чатыры гады ўстаноўлены маштабныя мэты. Абапіраючыся на місію, якая заключаецца ў забеспячэнні цэнавай і фінансавай стабільнасці, Нацыянальны банк мае намер дасягнуць пазіцыі ўстойлівай паспяховасці, забяспечваючы пры гэтым збалансаванасць інстытуцыянальнага развіцця па трох асноўных вектарах - давер, якасць і эфектыўнасць. Асноўны арыенцір - гэта развіццё Нацыянальнага банка як дзяржаўнага органа, які мае неабходныя для выканання сваёй місіі паўнамоцтвы, мае аптымальную арганізацыйную структуру і высокакваліфікаваны персанал, а таксама рэалізуе адкрытую, паслядоўную і зразумелую палітыку з дапамогай інструментаў і метадаў, якія адпавядаюць сучасным патрабаванням", - падкрэслілі ва ўпраўленні інфармацыі і грамадскіх сувязей.

Для дасягнення пастаўленых мэт у дакуменце сфармуляваны шэраг стратэгічных ініцыятыў Нацыянальнага банка на сярэднетэрміновую перспектыву. У іх ліку: пераход ад рэжыму манетарнага таргетавання да інфляцыйнага таргетавання, распрацоўка і стварэнне эфектыўнай інстытуцыянальнай архітэктуры фінансавай стабільнасці, гарантаванне бяспечнага функцыянавання банкаўскай сістэмы, фарміраванне спрыяльных умоў для пашырэння сферы прымянення лічбавых тэхналогій, паэтапная лібералізацыя валютных адносін.

У якасці прыярытэтных шляхоў і спосабаў інстытуцыянальнага развіцця Нацыянальнага банка вызначаны гібкасць і дынамічнасць, адкрытасць і камунікатыўнасць, канцэнтраванне на галоўных напрамках дзейнасці, павышэнне ўзроўню тэхналагічнасці працэсаў, прафесіяналізм і кампетэнтнасць, плацежаздольнасць і фінансавая ўстойлівасць, здаровы працоўны клімат і празрыстая самакрытычная ацэнка дзейнасці.

"Пераход на якасна новы ўзровень інстытуцыянальнага развіцця стане асновай паспяховасці Нацыянальнага банка ў дасягненні ўстаноўленых заканадаўствам асноўных мэт яго дзейнасці, што з'яўляецца неад'емнай умовай збалансаванага росту беларускай эканомікі, павышэння ўзроўню і якасці жыцця насельніцтва Беларусі", - канстатавалі ў Нацбанку.