Бізнес-навіны

23 кастрычніка, Мінск /Кар. БЕЛТА/. Нацыянальны банк мае намер запусціць у Беларусі сэрвіс імгненных плацяжоў у 2019 годзе, паведаміў намеснік старшыні праўлення Нацбанка Дзмітрый Калечыц на міжнародным форуме па банкаўскіх інфармацыйных тэхналогіях "БанкІТ'2018", перадае карэспандэнт БЕЛТА.

"Гэта базавы праект для многіх краін. Ён дасць магчымасць палепшыць плацежныя сэрвісы для прадпрыемстваў і фізічных асоб, каб плацяжы былі ў рэжыме рэальнага часу", - адзначыў Дзмітрый Калечыц.

Ужо вызначаны аператар і канцэпцыя імгненных плацяжоў, прапрацоўваюцца тэхнічныя аспекты ўкаранення сэрвісу. З 1 студзеня 2019 года плануецца пачаць яго доследную эксплуатацыю, з 1 ліпеня 2019 года - прамысловую. Укараненне сэрвісу дасць магчымасць атрымання грашовых сродкаў на працягу мінуты. Прадугледжана работа сэрвісу ў рэжыме 24/7.

Удзел для банкаў у сістэме імгненных плацяжоў будзе добраахвотным, дадаў намеснік старшыні Нацбанка.

Дзмітрый Калечыц таксама акрэсліў асноўныя напрамкі работы Нацбанка з улікам лічбавай трансфармацыі сектара. Гэта развіццё плацежнай і разліковай прасторы, аддаленая ідэнтыфікацыя, тэхналогіі размеркаванага рэестра, развіццё Open API, вялікія даныя, штучны інтэлект і машыннае навучанне, кібербяспека.