Бізнес-навіны

"Нам усё пад сілу, калі моцна захочам". Пархомчык аб імпартазамяшчэнні і праектах з Расіяй

Фота з архiва

30 студзеня, Санкт-Пецярбург /Кар. БЕЛТА/. Праекты ў галіне імпартазамяшчэння і прамысловай кааперацыі паміж Беларуссю і Расіяй набіраюць сваю моц. Аб гэтым на палях пасяджэння Вышэйшага дзяржсавета Саюзнай дзяржавы расказаў журналістам віцэ-прэм’ер Беларусі Пётр Пархомчык, перадае карэспандэнт БЕЛТА.

Адказваючы на пытанне аб сумеснай рабоце ў галіне імпартазамяшчэння, віцэ-прэм’ер сказаў: "Вельмі шмат зроблена. Усе тыя праграмы, якія ўзгоднены з Расійскай Федэрацыяй, цяпер набіраюць сваю моц і развіццё".

Паводле слоў Пятра Пархомчыка, паступова расце колькасць падпісаных з расійскім бокам інвестыцыйных дагавораў. І гэтыя сродкі ідуць не толькі ў развіццё эканомікі Беларусі, але і накіраваны на тое, каб вырашаць шэраг пытанняў, якія ёсць у Расійскай Федэрацыі, пераадолець часовыя цяжкасці, якія ўзніклі на фоне ўвядзення санкцый і сыходу заходніх партнёраў. І патэнцыял двухбаковага супрацоўніцтва ў гэтым напрамку далёка не вычарпаны. "Трэба знаходзіць новыя вялікія стратэгічныя праекты", - сказаў віцэ-прэм’ер.

Ён прывёў у якасці прыкладу праект паміж кампаніямі "Магілёўхімвалакно" і "Татнафта". Не так даўно стала вядома аб іх планах стварыць у Беларусі сумеснае прадпрыемства па вытворчасці поліэфірнай прадукцыі. Праект ацэньваўся ў чвэрць мільёна долараў ЗША.

Гаворачы аб іншых перспектыўных сферах, Пётр Пархомчык у першую чаргу вылучыў машынабудаванне, паколькі Беларусь захавала свой прамысловы патэнцыял і цяпер можа закрыць патрэбнасці Расіі ў шэрагу камплектуючых. "Мы ставім перад сабой задачу максімальнай лакалізацыі кампанентаў. Вырабляць у той колькасці, якая неабходна для эканомікі Беларусі і для эканомікі Расіі", - сказаў ён.

Яшчэ адзін прыклад перспектыўнага сумеснага праекта - гэта планы па арганізацыі вытворчасці ў Беларусі лёгкага 12-меснага самалёта. У краіне ўжо ёсць добрыя кампетэнцыі ў галіне рамонту шырокай лінейкі авіяцыйнай тэхнікі, але гэты праект - выхад на зусім іншы ўзровень. "Гэта значыць мы набываем пэўныя навыкі праектавання, распрацоўкі гэтага самалёта", - растлумачыў Пётр Пархомчык.

У гэтым жа плане разглядаюцца і планы па арганізацыі вытворчасці ў Беларусі скорасных рэдуктараў для легкавога электратранспарту. Гэта пытанне, дарэчы, нядаўна ўзнімалася ў час прыезду Прэзідэнта Беларусі на аўтазавод "БЕЛДЖЫ". "Ні Расія, ні Беларусь не вырабляюць такія рэдуктары. Гэта высакаякасныя шасцерні, алюмініевыя карпусы. Гэтыя магутнасці трэба ствараць. Не толькі для прамысловасці па вытворчасці легкавых аўтамабіляў у Беларусі, але і для Расійскай Федэрацыі", - сказаў віцэ-прэм’ер.

"Нам усё пад сілу, калі мы моцна захочам. Таму гэты рух пачынаецца ўжо. І яшчэ вельмі шмат тэм, якія сёння выяўляюцца, якія неабходна вырашаць. Вельмі важна далей прадаўжаць працаваць і знаходзіць патрэбныя праекты ў рамках нашай Саюзнай дзяржавы", - рэзюмаваў Пётр Пархомчык.

версія для друку

зрабіць стартавай

дабавіць у выбранае