Бізнес-навіны

На БелАЭС уключана ў работу чацвёртая высакавольтная лінія

Фота з архiва

25 лютага, Мінск /Кар. БЕЛТА/. На Беларускай АЭС уключана ў работу чацвёртая высакавольтная лінія, што звязвае атамную станцыю з энергасістэмай. Аб гэтым паведамілі БЕЛТА ў прэс-службе "Белэнерга".

Паводле інфармацыі спецыялістаў, паспяхова рэалізавана праграма па ўводзе паветранай высакавольтнай лініі 330 кВ "Беларуская АЭС - Паставы нумар 2". Гэта лінія звязвае высакавольтнае размеркавальнае ўстройства АЭС з падстанцыяй 330 кВ "Паставы".

Праектам вызначана, што сувязь БелАЭС з энергасістэмай павінна ажыццяўляцца па сямі высакавольных лініях 330 кВ: "Беларуская АЭС - Смаргонь", "Беларуская АЭС - Мінск Паўночная", "Беларуская АЭС - Паставы нумар 1", "Беларуская АЭС - Паставы нумар 2", "Беларуская АЭС - Маладзечна", "Беларуская АЭС - Рось", "Беларуская АЭС - Стоўбцы". Будаўніцтва ліній завершана. Па меры гатоўнасці асноўнага абсталявання і ўстройстваў рэлейнай абароны і проціаварыйнай аўтаматыкі на БелАЭС ажыццяўляецца ўвод гэтых ліній у работу.

"Для ўключэння першага энергаблока АЭС неабходна, каб высакавольтнае размеркавальнае ўстройства на станцыі мела сувязі з падстанцыямі энергасістэмы па чатырох уведзеных у работу высакавольтных лініях. Такім чынам, да раней уведзеных у работу трох высакавольтных ліній 330 кВ "Беларуская АЭС - Мінск Паўночная", "Беларуская АЭС - Смаргонь" і "Беларуская АЭС - Паставы нумар 1" уключана чацвёртая лінія "Беларуская АЭС - Паставы нумар 2" і забяспечаны мінімальна неабходны для ўключэння першага энергаблока атамнай станцыі склад ліній электраперадачы, адыходзячых ад атамнай станцыі. Разам з тым прадаўжаюцца работы па падрыхтоўцы да ўключэння астатніх трох ліній", - растлумачылі ў прэс-службе.

Асаблівасцю рэалізацыі праграмы ўключэння гэтай лініі была праверка функцыі рэлейнай абароны дзвюх ліній "Беларуская АЭС - Паставы нумар 1" і "Беларуская АЭС - Паставы нумар 2", што выключае ў алгарытме сваёй работы ўплыў узаемаіндукцыі паралельных ліній электраперадачы пры кароткіх замыканнях на зямлю для забеспячэння селектыўнай работы ўстройстваў рэлейнай абароны і аўтаматыкі. Названая функцыя ўпершыню прымяняецца для ўстройстваў рэлейнай абароны і аўтаматыкі сістэмаўтваральнай сеткі энергасістэмы Беларусі.

версія для друку

зрабіць стартавай

дабавіць у выбранае