Бізнес-навіны

Міжнародны форум ТІБО-2023 стартаваў у Мінску

17 красавіка, Мінск /Кар. БЕЛТА/. У Мінску стартаваў міжнародны форум ТІБО-2023, перадае карэспандэнт БЕЛТА.

Форум ТІБО - унікальная пляцоўка для абмену перадавым вопытам у сферы інфармацыйных тэхналогій, аналізу лепшых сусветных практык лічбавай трансфармацыі і абмеркавання перспектыў эфектыўнага выкарыстання найноўшых тэхналагічных трэндаў у традыцыйных галінах эканомікі. На працягу чатырох дзён дзяржаўныя арганізацыі і прыватныя кампаніі будуць прадстаўляць свае распрацоўкі і тэхналогіі на пляцоўцы "Мінск-Арэны".

Напрыклад, Нацыянальная акадэмія навук Беларусі прэзентуе больш за 50 распрацовак і тэхналогій. Адукацыйная галіна прадстаўлена больш як 20 навучальнымі ўстановамі. На "адукацыйнай алеі" беларускія ВНУ і пяць навучальных устаноў з Расійскай Федэрацыі прадставяць свае адукацыйныя паслугі і магчымасці пры навучанні.

РУП "Белпошта" прапануе азнаёміцца з электроннымі лічбавымі сэрвісамі. "На стэндзе прадстаўлена нацыянальная паштовая электронная сістэма. Мы прэзентуем некалькі новых напрамкаў, якія аблягчаюць доступ да паслуг. У прыватнасці, прадстаўлены сэрвіс па ідэнтыфікацыі і рэгістрацыі карыстальніка з дапамогай ID-карткі праз смартфон", - расказаў намеснік генеральнага дырэктара па тэхнічных пытаннях Сяргей Патапенка.

Акрамя гэтага, "Белпошта" прадстаўляе тэхналогію біяметрычнай ідэнтыфікацыі кліента з выкарыстаннем праграмнага забеспячэння. "Для юрыдычных асоб мы прэзентуем электронную авансавую сістэму, скарыстацца якой можна з дапамогай мабільнага дадатку. Яна дае магчымасць аплачваць паслугі з дапамогай электроннага асабовага рахунку", - адзначыў ён. Акрамя гэтага, на стэндзе прадпрыемства прадстаўлены сэрвіс "Мабільны паштальён". "У нас каля 15 паслуг, якія запатрабаваны ў гарадах і сельскай мясцовасці", - дадаў Сяргей Патапенка.

На выстаўцы ТІБО кампанія МТС прэзентавала новыя прадукты для беларускага бізнесу, а таксама нагадала аб кібербяспецы. Сярод іх паслугі на базе воблачных тэхналогій МТС Cloud, у якога ёсць уласны дата-цэнтр, а таксама розныя лічбавыя сэрвісы і паслугі, што адкрываюць для кампаній (прыватнай і дзяржаўнай формы ўласнасці) новыя магчымасці для росту. "На ТІБО-2023 наша галоўная мэта - падкрэсліць імкненне рухацца наперад і выйсці за межы тэлекамунікацыйнай галіны ў новыя для кампаніі сегменты. У прыватнасці, па новым напрамку МТС Cloud мы прадстаўляем комплекснае рашэнне па інфармацыйнай бяспецы і паслугу па аддаленым маніторынгу і кіраванні IT-інфраструктурай пад назвай "Прафесійны сэрвіс", - расказаў намеснік генеральнага дырэктара па маркетынгу МТС Віталь Адорскі.

Сярод лічбавых рашэнняў ён адзначыў "МТС Апытанне" і "МТС Камунікатар", якія ўжо ацанілі карыстальнікі. Яшчэ адна навінка - галасавы робат, які дае магчымасць аўтаматызаваць апрацоўку ўваходных і выходных званкоў. Асаблівы інтарэс у бізнес-заказчыкаў выклікаюць рашэнні на аснове аналізу і апрацоўкі абязлічаных даных, так званых вялікіх даных, падкрэсліў Віталь Адорскі. "У прыярытэце прадукты на аснове геааналітыкі, якія даюць магчымасць буйным заказчыкам дакладней планаваць свае інвестыцыі", - сказаў ён.

Адметнай асаблівасцю выставачнай часткі форуму стала цэнтральная экспазіцыя Міністэрства сувязі і інфарматызацыі і дзяржорганаў "Гарады будучыні - разумныя гарады". На выстаўцы таксама прадстаўлены калектыўныя экспазіцыі Мінсувязі, Мінадукацыі, Мінпрама, Мінэнерга, Міністэрства лічбавага развіцця Расійскай Федэрацыі, Кітайскай Народнай Рэспублікі, "Расатама", прадпрыемстваў Масквы, Санкт-Пецярбурга, Ніжагародскай вобласці, Курскай вобласці, Мінскага гарадскога тэхнапарка, Нацыянальнай акадэміі навук, ДКНТ, электроннай гандлёвай пляцоўкі Саюзнай дзяржавы. Упершыню ў гэтым годзе ўдзельнікам выстаўкі стаў Кітайска-беларускі індустрыяльны парк "Вялікі камень", уключаючы пяць яго рэзідэнтаў.

Міжнародны форум па інфармацыйна-камунікацыйных тэхналогіях ТІБО-2023 прадоўжыцца па 21 красавіка. На выстаўцы прадукцыю і паслугі прадстаўляюць вядомыя вытворцы тэлекамунікацыйнага абсталявання, апаратных сродкаў і праграмнага забеспячэння, аператары мабільнай і фіксаванай сувязі, распрацоўшчыкі і пастаўшчыкі высокатэхналагічных прадуктаў, сістэм бяспекі, інтэлектуальных рашэнняў і сэрвісаў для масавага і карпаратыўнага сегмента, навуковыя і адукацыйныя ўстановы. На пляцоўцы "Мінск-Арэны" пройдуць III Форум "Лічбавая эканоміка", V Еўразійскі лічбавы форум і VI Беларускі ІКТ-саміт. Пройдуць і спадарожныя мерапрыемствы - Інтэрнэт-прэмія ТІБО, рэспубліканскі конкурс стартап-праектаў Belarus ICT Startup Award, нацыянальны адборачны этап VI Міжнароднай Scratch-алімпіяды па крэатыўным праграмаванні сярод школьнікаў, Мінскі адкрыты турнір па адукацыйнай робататэхніцы і рэспубліканскі чэмпіянат па кіберспорце.

версія для друку

зрабіць стартавай

дабавіць у выбранае