Бізнес-навіны

Міністэрства аховы здароўя Беларусі чакае з Расіі дазвол на выкарыстанне 180 тыс. доз другога кампанента

10 чэрвеня, Мінск /Кар. БЕЛТА/. Міністэрства аховы здароўя Беларусі чакае з Расіі дазвол на выкарыстанне 180 тыс. доз другога кампанента, паведамляе БЕЛТА са спасылкай на прэс-службу Міністэрства аховы здароўя.

На сённяшні дзень калегі з Расійскай Федэрацыі завяршаюць правядзенне працэдуры кантролю якасці вакцыны, якая была выраблена на магутнасцях РУП "Белмедпрэпараты". Плануецца, што ў грамадзянскі абарот вакцына паступіць да канца тыдня.

У краіне больш за 656 тыс. чалавек атрымалі першую дозу вакцыны супраць COVID-19, з іх больш за 358 тыс. прайшлі поўны курс вакцынацыі.

На сённяшні дзень і да канца тыдня ў краіне ёсць у наяўнасці больш за 150 тыс. доз першага кампанента і больш за 30 тыс. доз другога. З улікам узніклай 9 чэрвеня сітуацыі з адсутнасцю вакцыны ў некаторых паліклініках сталіцы, сёння будзе пераразмеркаваны яе другі кампанент, адзначылі ў Міністэрстве аховы здароўя. Пры гэтым дадалі, што тэрмін правядзення этапаў вакцынацыі залежыць непасрэдна ад часу паступлення партый вакцыны (вытворчасці вакцыны) пасля праходжання працэдуры якасці.

У Беларусі цяпер праходзяць першы і другі этапы вакцынацыі - прышчэпкі атрымалі практычна ўсе, хто падаў заяўкі, медыцынскія і фармацэўтычныя работнікі, спецыялісты сацыяльнай сферы і сферы адукацыі, а таксама дарослыя, якія пражываюць ва ўстановах з кругласутачным рэжымам знаходжання. Гэта тыя грамадзяне, у каго найбольш высокая рызыка заражэння COVID-19 з-за іх прафесійнай дзейнасці і іншых умоў. Таксама вакцынуюцца тыя, хто мае высокую рызыку цяжкага праходжання COVID-19: людзі ва ўзросце 60 гадоў і старэйшыя, асобы з хранічнымі захворваннямі.

У Міністэрстве аховы здароўя звярнулі ўвагу, што інтэрвал паміж увядзеннем першага і другога кампанента расійскай вакцыны Гам-КАВІД-Вак ("Спадарожнік V") можа скласці ад 21 да 90 дзён.

версія для друку

зрабіць стартавай

дабавіць у выбранае