Бізнес-навіны

Мінскі аўтазавод прадставіў тэхніку для лясной прамысловасці на выстаўцы ў Волагдзе

10 снежня, Мінск /Кар. БЕЛТА/. Мінскі аўтамабільны завод сумесна з ТАА ВК "Рускі грузавік" прадставіў на выстаўцы "Расійскі лес - 2021" у Волагдзе лінейку аўтатэхнікі, распрацаваную спецыяльна для лясной прамысловасці, паведамілі БЕЛТА ў прэс-службе беларускага прадпрыемства.

"Асаблівую ўвагу наведвальнікаў прыцягнуў мабільны офіс МАЗ-673110, абсталяваны ўсім неабходным для забеспячэння камфортных умоў пры рабоце на выязных нарадах і перагаворах. Такая тэхніка незаменная ў лясной прамысловасці, бо адлегласці ў гэтай сферы вымяраюцца сотнямі і тысячамі кіламетраў, таму арганізоўваць работу часта даводзіцца далёка ад даброт цывілізацыі. Мабільны офіс вытворчасці Мінскага аўтамабільнага завода дае магчымасць лёгка вырашыць гэту праблему", - расказалі ў прэс-службе.

У Волагдзе з 8 па 10 снежня працуюць міжнародны лясны форум і выстаўка "Расійскі лес – 2021". На форуме абмяркоўваюцца важнейшыя для лясной галіны пытанні арганізацыі эфектыўнага лесакарыстання і лесааднаўлення, аховы і абароны лесу, укаранення перадавых тэхналогій у гэтай галіне і г.д. Спецыялізацыя выстаўкі "Расійскі лес" накіравана на збліжэнне навуковых распрацовак з вядзеннем лясной гаспадаркі, лесакарыстання і лясной прамысловасці. Мерапрыемствы, якія праводзяцца ў рамках выстаўкі, дазваляюць выкарыстоўваць яе ў якасці міжнароднай камунікацыйнай пляцоўкі для ўсіх, хто працуе ў лясным комплексе. Кампаніі-ўдзельніцы прадстаўляюць экспазіцыі на больш як 3 тыс. кв.м адкрытай і закрытай выставачнай плошчы. На адкрытых выставачных плошчах дэманструецца больш за 50 адзінак сучаснай лясной тэхнікі і дрэваапрацоўчага абсталявання.

Мінскі аўтамабільны завод - адно з буйнейшых беларускіх машынабудаўнічых прадпрыемстваў, якое спецыялізуецца на выпуску велікагрузных аўтамабіляў, спецтэхнікі, аўтобусаў, тралейбусаў і прычапной тэхнікі. Гандлёвая марка МАЗ шырока вядома ў СНД і далёкім замежжы. Тэхніка адпавядае экалагічным стандартам Еўра-3, 4, 5, 6. З канвеера завода сходзяць седлавыя цягачы, бартавыя аўтамабілі, шасі пад устаноўку рознага спецабсталявання - усяго больш як 500 мадэлей і 3 тыс. мадыфікацый.

версія для друку

зрабіць стартавай

дабавіць у выбранае