Бізнес-навіны

Мінсельгасхарч: па выніках года чакаецца рэкордны экспарт беларускіх прадуктаў харчавання

Фота з архiва

26 кастрычніка, Мінск /Кар. БЕЛТА/. Па выніках года чакаецца рэкордны экспарт беларускіх прадуктаў харчавання. Аб гэтым заявіў сёння журналістам міністр сельскай гаспадаркі і харчавання Ігар Брыло ў кулуарах міжнароднага форуму "Беларусь малочная", перадае карэспандэнт БЕЛТА.

"Беларусь займае адно з лідзіруючых месцаў у свеце па вытворчасці малака на душу насельніцтва. Узровень самазабеспячэння па малаку - 263 працэнты. Гэта значыць мы не толькі забяспечваем унутраны рынак малочнай прадукцыяй, але і даволі шмат экспартуем. Па выніках года лічба экспарту прадуктаў харчавання будзе зноў рэкордная, на ўзроўні $8 млрд (за 9 месяцаў ужо $5,2 млрд, рост на 25 працэнтаў), з гэтага больш за 50 працэнтаў - малочная прадукцыя. Гэта сведчыць аб тым, што, нягледзячы ні на якія санкцыі, Беларусь прадае свае тавары, наша прадукцыя вядома ў свеце і карыстаецца заслужаным аўтарытэтам", - сказаў Ігар Брыло і звярнуў увагу на тое, што беларускія прадукты харчавання пастаўляюцца больш як у 100 краін свету.

Паводле яго слоў, рэнтабельнасць вытворчасці малочнай прадукцыі добрая, цэнавая кан'юнктура ў свеце спрыяльная. Таму нашы прадпрыемствы нядрэнна спрацоўваюць з прыбыткам. Павялічваюцца пастаўкі ў Расію, Кітай. Краіны Азіі, Акіяніі, Афрыка - мы прысутнічаем усюды", - адзначыў міністр.

На пытанне, як ідуць справы з абсталяваннем і запаснымі часткамі ва ўмовах санкцый, ён адказаў: "Любыя запчасткі, якія не вырабляюцца ў Беларусі, завозяцца. Ніякіх праблем з гэтым няма".

Міжнародны форум "Беларусь малочная" праходзіць у Мінску 26-27 кастрычніка. "Форум з кожным годам набывае вялікую значнасць у нашай краіне, выклікае прафесійны інтарэс не толькі ў нашых вытворцаў і перапрацоўшчыкаў малака, але і ў прадстаўнікоў іншых краін. У гэтым годзе мерапрыемства сабрала рэкордную колькасць удзельнікаў - каля 450. Прыехалі да нас і аналітыкі, і пакупнікі, і навуковыя супрацоўнікі з РФ, Узбекістана, Сінгапура, Канады, Германіі, Польшчы. Форум набірае абароты", - звярнуў увагу Ігар Брыло.

Галоўныя тэмы форуму - як Беларусі ўмацаваць пазіцыі на сусветным малочным рынку і больш зарабляць на малаку ва ўмовах санкцый, што пастаўляць у расійскія рэгіёны, за кошт чаго дыверсіфікаваць экспарт і імпарт, дзе шукаць новых пастаўшчыкоў абсталявання і ўпакоўкі і як аптымізаваць лагістыку. Кіраўнікі і галоўныя спецыялісты прадпрыемстваў абмяркуюць з вядучымі экспертамі і кіраўніцтвам галіны галоўныя рыначныя трэнды і звязаныя з імі задачы і магчымасці.

версія для друку

зрабіць стартавай

дабавіць у выбранае