Бізнес-навіны

Мінэканомікі: Беларусь зацікаўлена ў прыцягненні прыватных інвестыцый для развіцця інфраструктуры

Фота з архiва

24 лістапада, Мінск /Кар. БЕЛТА/. Беларусь зацікаўлена ў прыцягненні прыватных інвестыцый для развіцця інфраструктуры. Аб гэтым заявіла начальнік галоўнага ўпраўлення інвестыцыйнай палітыкі Мінэканомікі Ірына Калянчак, выступаючы на Беларускім інвестыцыйным форуме ў Маскве.

Ірына Калянчак адзначыла, што ў мінулым годзе ў нацыянальнае заканадаўства аб дзяржаўна-прыватным партнёрстве быў унесены шэраг істотных змяненняў, якія ўступілі ў сілу ў 2023-м годзе. Гэтыя змяненні накіраваны на паскарэнне рэалізацыі праектаў ДПП.

"Пералік аб'ектаў для заключэння пагадненняў аб ДПП дапоўнены інфармацыйна-камунікацыйнай інфраструктурай. Зменшана колькасць дзяржорганаў, якія ўдзельнічаюць у падрыхтоўцы праектаў. Рэалізацыя праектаў, якія фінансуюцца толькі з мясцовых бюджэтаў, не падлягае ўзгадненню з Мінфінам і Мінэканомікі. Усё гэта істотна скараціла тэрмін іх падрыхтоўкі. Улічаны паспяховы вопыт Расіі і іншых краін, якія дазволілі ў некаторых выпадках заключаць пагадненні аб ДПП без правядзення конкурсу. Гэта значна спросціць і паскорыць рэалізацыю праектаў, якія не прадугледжваюць удзел бюджэтных сродкаў", - падкрэсліла начальнік галоўнага ўпраўлення.

Яна запэўніла, што работа па ўдасканаленні інвестыцыйнага клімату, у тым ліку механізма ДПП для рэалізацыі інфраструктурных і сацыяльна значных праектаў на тэрыторыі Беларусі будзе прадоўжана. Са свайго боку Мінэканомікі абавязуецца аказаць садзейнічанне ў іх пашырэнні як у арганізацыйнай частцы, так і ў зняцці "вузкіх месцаў" у заканадаўстве.

версія для друку

зрабіць стартавай

дабавіць у выбранае